Auglýsti eftir kærasta á Brask og brall: Hrúguðust inn ábendingar á nokkrum mínútum

„Ég auglýsti eftir kærasta, ekki maka, höfum það alveg á hreinu,“ segir Inga Vala Birgisdóttir, í samtali við Brennsluna á FM957 í morgun.

Hún fór nýjar leiðir í leit sinni og auglýsti eftir kærasta á hinni vinsælu Facebook-grúppu Brask og brall.

„Mér fannst þetta bara góður tími til að auglýsa eftir kærasta. Það vantaði bara svona smá stemningu í laugardagskvöldið mitt. Ég hefði auðvitað getað farið út að skemmta mér, fengið með eitthvað að drekka og verið með rosalegan móral daginn eftir. Ég hugsaði frekar að vera bara heiðarleg og skrifa um mig eins og ég er.“

Inga segir að færslunni hafi verið eytt af síðunni.

„Það var bara rétt byrjað að hrúgast inn ábendingar um tilvonandi kærasta og svo bara þagnaði allt eftir tvær mínútur,“ segir Inga sem fékk samt sem áður nokkur skilaboð frá karlmönnum eftir þann stutta tíma sem auglýsingin var í loftinu.

„Ég svaraði þeim ekki, þetta var ekki nægilega spennandi. Ég verð 46 ára á morgun og ég er ekkert endalaust úti á lífinu lengur. Ég er heldur ekkert ræktarfrík svo ég kynnist ekki karlmönnum í ræktinni. Ég sá því fyrir mér að ég myndi vaka aðeins lengur en til hálf eitt á laugardagskvöldið, því þetta byrjaði spennandi eftir að auglýsingin kom inn. Svo var bara slökkt á auglýsingunni og því fór ég bara að sofa snemma.“

Inga hefur áhuga á manni sem hefur svipuð áhugamál og hún.

„Hann verður að fara með mér út að labba með hundana. Hann má ekki vera eitthvað íþróttafrík sem fer upp fimm fjöll á dag. Það væri kostur ef hann gæti eldað.“

Hér að neðan má heyra viðtalið sem þeir Kjartan og Hjörvar tóku við hana Ingu í morgun.