Tveir landeigendur á Vatnsleysuströnd hyggjast á næstu dögum kanna hug nágranna sinna varðandi möguleikann á því að segja skilið við sveitarfélagið Voga og ganga þess í stað til liðs við Hafnarfjörð. Þeir eru í meira lagi ósáttir með þjónustuna sem þeir fá frá Vogum og segir annar þeirra að þeir upplifi sig sem utangarðsmenn.

„Ég hef talað við fólk og það er mikil óánægja með þjónustuna og það að við skulum vera í þessu bæjarfélagi,“ segir Virgill Scheving Einarsson. „Ég fer í pottana í Suðurbæjarlaug í Hafnarfirði og þeir segja að okkur sé miklu betur varið með Hafnarfirði en í þessu plássi, því þeir munu til dæmis senda hingað moksturstæki.“

Virgill og nágranni hans, Stefán Árnason í Austurkoti, hafa þegar haft samband við Hafnarfjarðarbæ og segjast hafa fengið jákvæð viðbrögð þar. Enda þurfi bærinn meira land til að byggja á.

Að sögn Virgils eru þeir Stefán meðal annars ósáttir við að ekkert hafi verið mokað við bæina í vetur, bréfum til bæjarstjórnar sé ekki svarað og að aðeins fáeinum íbúum hverfisins sé séð fyrir vatni.

„Það er skilti komið þarna upp við Vogana þar sem fólk er hvatt og sagt „Góða ferð,“ þegar það keyrir hingað. Svo þegar maður kemur héðan í Vogana, þá stendur „Velkominn í Voga,““ bendir hann á. „Það er eins og þessi staður hérna sé ekki til.“

Rúmlega þúsund manns búa í sveitarfélaginu Vogum, sem áður hét Vatnsleysustrandarhreppur, þar af langflestir í þéttbýliskjarna. Árið 2005 gengu íbúar Vatnsleysustrandarhrepps og Hafnarfjarðar til kosninga um sameiningu sveitarfélaganna en íbúar Voga höfnuðu því.

Þeir Virgill og Stefán stefna á að funda fljótlega með bæjarstjórn Hafnarfjarðar þegar búið er að ganga í hús í hverfinu og kanna hug manna til þess að skipta um bæjarfélag. Meirihluti þarf að vera meðal íbúa hverfisins til þess að málið geti farið fyrir innanríkisráðuneytið og Alþingi, að sögn Virgils. Hann segist vongóður um að nágrannarnir taki vel í hugmyndina.

„Þegar það er búið að leggja fyrir þau forsendurnar, til dæmis það að land mun hækka í verði,“ segir hann. „Þetta liggur ljóst fyrir, því Vatnsleysuströnd er fáeinum kílómetrum fyrir sunnan Hafnarfjörð. Þannig að ég er bjartsýnn, ég tal að hag okkar sé miklu betur farið í Hafnarfirði.“