Þrjár þáttaraðir til viðbótar af Orange is the New Black

Streymiþjónustan Netflix hefur tilkynnt að þrjár þáttaraðir til viðbótar verði framleiddar af sjónvarpsþættinum "Orange is the New Black."

Þátturinn hefur notið mikilla vinsælda en fjórða þáttaröðin fer í loftið á Netflix í júní. Í frétt CNN um málið í dag kemur fram að tilkynningin nú, um að þrjár þáttaraðir til viðbótar verði framleiddar, sýni hversu mikla trú Netflix hafi á þáttunum.

"Orange is the New Black" gerist í kvennafangelsi í Bandaríkjunum og fjallar um líf fanganna og starfsmannanna þar. Þættirnir hafa unnið til ýmissa verðlauna, meðal annars á SAG-verðlaunahátíðinni um seinustu helgi þar sem leikarahópurinn vann til verðlauna fyrir besta leik í gamanþáttum og leikkonan Uzo Aduba var valin besta leikkonan.