Jóhanna segir að Kári verði að setja hluti í rétt samhengi ef hann vill láta taka sig alvarlega

Jóhanna Sigurðardóttir fyrrverandi forsætisráðherra svarar Kára Stefánssyni á Facebook-síðu sinni vegna aðsendrar greinar sem Kári skrifaði í Fréttablaðið í dag og Vísir fjallaði um í morgun. Jóhanna deilir frétt Vísis um greinina og spyr hvort að Kári hafi gleymt því að þegar vinstri stjórnin tók við árið 2009 voru uppi fordæmalausar aðstæður á Íslandi þar sem gjaldþrot blasti við þjóðinni. 

Í greininni sagði Kári að pólitísk hugmyndafræði stjórnmálamanna skipti engu máli þegar þeir væru komnir til valda. Þannig hafi ríkisstjórn Jóhönnu Sigurðardóttur holað velferðarkerfið að innan þrátt fyrir að Samfylking og Vinstri græn hafi „alltaf lofað að hlúa að velferðarkerfinu og verja það gegn öllu illu.“

Eflaust er einhverjum í fersku minni hvers vegna þessar fordæmulausu aðstæður sköpuðust enda aðeins tæp átta ár frá efnahagshruninu haustið 2008. Um þetta ástand segir Jóhanna:

„Ríkisstjórn mín tók við stjórn landsins við erfiðustu efnahagslegu skilyrði sem verið hafa í sögu lýðveldisins. Engu að síður setti ríkisstjórnin sér það markmið að verja velferðarkerfið eins og kostur væri í þeim niðurskurði sem óhjákvæmilegt var að ráðast í. Bæði AGS og virtir nóbelsverðlaunahafar í hagfræði hafa sagt það kraftaverki líkast hvernig til tókst við endurreisn Íslands, ekki síst við að verja innviði velferðarkerfisins. Kári Stefánsson hefur margt gott lagt til heilbrigðismála á Íslandi en hann verður að setja hluti í rétt samhengi ef hann vill láta taka sig alvarlega,“ segir Jóhanna í færslu sinni sem sjá má hér að neðan.