Sigmundur segir fagnaðarlæti hafa brotist út í New York þegar hann fór frá

Sigmundur Davíð Gunnlaugsson, oddviti Framsóknarmanna í Norðausturkjördæmi, er enn með hugann við þær vendingar sem leiddu til þess að hann lét af forsætisráðherradómi. Það er ef marka má nýja Facebookfærslu Sigmundar Davíðs.

Þar segir hann fagnaðarlæti hafa brotist út á nokkrum stöðum í Reykjavík þegar hann fór frá, en Sigmundur Davíð boðar að hann muni fjalla betur um það síðar. Og þá hafi honum borist fréttir af því að hópur manna í New York hafi opnað kampavínsflösku af tiltekinni tegund, sem Sigmundur Davíð man ekki hver var, en flaskan hafi verið geymd uppi á hillu og var kölluð Íslandsflaskan.

„Þótt búið sé að opna Íslandsflöskuna er afskiptum þessara aðila af málum á Íslandi ekki lokið.“

Þá greinir Sigmundur Davíð frá því að hann hafi birt gamla grein sem hann ætlaði að birta í erlendum fjölmiðlum á sínum tíma „þegar ég væri kominn aftur á fullt í stjórnmálabaráttunni og óvissuástandi í Framsóknarflokknum væri lokið. Þau mál þróuðust eins og þau gerðu og standa eins og þau standa.“

Sigmundur segir að nú sé hins vegar staðan sú að „vogunarsjóðirnir og talsmenn þeirra hins vegar farnir að láta aftur á sér kræla meðal annars með auglýsingum í blöðum hér á landi og erlendis. Erlendir fjölmiðlar virðast auk þess sýna kosningum á Íslandi talsverðan áhuga. Á sama tíma veldur þróunin í stjórnmálum hér á landi og víðar mér talsverðum áhyggjum.“

Af þeim sökum ákvað Sigmundur að birta greinina nú, áður óbirta, á ensku, en væntanleg sé íslensk þýðing hennar. Þar segir að á daginn hafi komið að allar ásakanir á hendur sér hafi verið uppspuni og skattur hafi verið greiddur af öllum reikningum sínum og konu sinnar.