David Lynch stríðir að­dá­endum Twin Peaks með kleinu­hringja­áti

David Lynch er gríðarlega David Lynch-legur í nýrri kitlu fyrir þættina Twin Peaks sem væntanlegir eru á næsta ári.

Í kitlunni, sem er ekki nema um 18 sekúndur, má sjá Lynch í gervi alríkislögreglumannsins Gordon Cole að borða kleinuhring.

Þar með er það upptalið. Ein sekúnda af kleinuhringjaáti fyrir hvern þátt af Twin Peaks sem aðdáendur geta leyft sér að hlakka til.

Twin Peaks er framhald samnefndra þátta sem tröllriðu öllu í upphafi 10 áratugarins. Þættirnir fjölluðu um rannsókn lögreglumannsins Dale Cooper á hrottalegu morði á ungri stúlku og eftirmála þess.

Leikaralisti þáttanna var opinberaður fyrr í ár og hann telur alls um 217 nöfn. Þeirra á meðal eru leikarar á borð við Michael Cera, Tim Roth og Jennifer Jason Leigh ásamt tónlistarmönnunum Eddie Vedder og Trent Reznor. Þá mun Kyle MacLachlan snúa aftur í hlutverki Dale Cooper.

Kitluna má sjá hér að neðan.