Leggja allt kapp á að ná til vannærðra barna í Mið- og Vestur-Afríku

Barnahjálp Sameinuðu þjóðanna (UNICEF) hefur stóraukið aðgerðir sínar í Vestur- og Mið-Afríku til að koma í veg fyrir frekari hörmungar þar sem um hálf milljón barna eru nú í lífshættu vegna vannæringar.

Í frétt á vef UNICEF segir að tölur frá Borno-héraði í norðausturhluta Nígeríu bendi til þess að ástandið jaðri við hungursneyð á ákveðnum svæðum. Héraðið er á stærð við Ísland og búa þar um 65 þúsund manns við aðstæður sem svipi til hungursneyðar. Það þýði að fjöldi manns sé í raunverulegri hættu á að deyja vegna matarskorts – nokkuð sem sjaldan sjáist í heiminum.

„Til að hungursneyð sé formlega lýst yfir þurfa til dæmis tveir fullorðnir eða fjögur börn á hverja 10.000 íbúa að deyja á dag og 20% fólks að líða mjög alvarlegan matarskort. Börn á aldrinum 6 mánaða til 5 ára eru í mestri hættu. Þar af eru börn 6 mánaða til 2 ára viðkvæmust og fyrst til að láta lífið.

Barn sem þjáist af alvarlegri bráðavannæringu er margfalt líklegra til að deyja af völdum sjúkdóma en önnur börn sem veikjast, til dæmis af malaríu, lungnabólgu og niðurgangspestum,“ segir í fréttinni.

UNICEF á Íslandi hóf í gær neyðarsöfnun vegna ástandsins í Nígeríu og nágrannaríkjunum þar sem rúmlega tvö hundruð börn láta lífið á degi hverjum vegna vannæringar. Með réttri meðhöndlun megi koma í veg fyrir 99 prósent dauðsfallanna.

Bergsteinn Jónsson, framkvæmdastjóri UNICEF á Íslandi, segir að með þremur pökkum á dag af vítamínbættu jarðhnetumauki, ásamt saltupplausnum og lyfjum ef þess þurfi – nái flest börn sér á einungis fáeinum vikum. Magnað sé að sjá árangurinn.

„Tíminn er hins vegar naumur og við verðum að bregðast hratt við. Við heyrum í gegnum samstarfsfólk okkar á vettvangi af dauðsföllum þar sem börn hafa hreinlega soltið til dauða. Nauðsynlegt er að fara hús úr húsi til að finna börn og koma þeim í meðferð. Sem betur fer eru 15.000 sjálfboðaliða á svæðinu með okkur í þessu,“ segir Bergsteinn.

Nánar má lesa um söfnunina á vef UNICEF.