Stúdentar krefjast þess að LÍN-frumvarpið verði tekið á dagskrá

Félag stúdenta við Háskólann á Akureyri (FSHA) og stjórn Stúdentaráðs Háskóla Íslands (SHÍ) krefjast þess að Alþingi ljúki fyrstu umræðu um frumvarp menntamálaráðherra um Lánasjóð íslenskra námsmanna. Sumarið sé mikilvægur tími til þess að ræða þá vankanta sem eru á frumvarpinu.

Í tilkynningu frá SHÍ segir að brýnt sé að málið verði tekið fyrir og að eitt stærsta hagsmunamál stúdenta sé í húfi.

„Á sumrin eru stúdentar ekki bundnir við lestur námsbóka og eru því kjöraðstöðu til þess að kynna sér frumvarpið. Það er veigamikill þáttur sem stuðlar að því að þeir að geti komið sínum athugasemdum til nefnda. Því er mikilvægt að málið sé komið í nefndir fyrir sumarfrí,“ segir í tilkynningunni.

Undir þetta tekur FSHA sem segir að mikilvægt sé að LÍN-frumvarpið verði sett á dagskrá fyrir sumarhlé svo hægt verði að koma málinu í lýðræðislegt umsagnarferli í þingnefndum yfir sumarið.

„Um er að ræða viðamikið frumvarp og því er ótækt að formlegu samráðsferli við stúdenta og aðra hagsmunaaðila verði frestað fram yfir sumarhlé Alþingis,“ segir í tilkynningu FSHA

Þá hefur Stjórn Stúdentafélags Háskólans í Reykjavík einnig skorað á Alþingi að ljúka fyrstu umræðu um frumvarp menntamálaráðherra um Lánasjóð íslenskra námsmanna.

Samkvæmt nýju frumvarpi um heildarendurskoðun laga um Lánasjóð íslenskra námsmanna munu námsmenn í fullu námi geta fengið 65 þúsund krónur á mánuði í beinan styrk í alls 45 mánuði, sem svarar til fimm hefðbundinni skólaára. Námsmenn geta ákveðið að taka eingöngu styrk, eða styrk og lán, eða jafnvel lán að hluta.

Frumvarpið er alls ekki óumdeilt en því var dreift á Alþingi í vikunni. Stjórnarandstaðan tók hins vegar ekki í mál að það færi á dagskrá þingsins. Árni Páll Árnason, formaður Samfylkingarinnar, sagði enga leið að setja svo umdeilt mál sem eru nýkomin fram á dagskrá og moka þeim í gegnum fyrstu umræðu, án nokkurrar umræðu.