Vantraust samþykkt á forsætisráðherra Túnis

Túniska þingið samþykkti nú í kvöld vantrauststillögu á ríkisstjórn Habib Essid. 118 þingmenn samþykktu tillöguna, 27 sátu hjá og þrír studdu áframhaldandi setu hennar. AFP greinir frá.

Aðeins er rétt rúmt hálft ár síðan ríkisstjórn Essid tók við í landinu. Síðan þá hefur hún þurft að sitja undir ásökunum um að gera ekki nóg í baráttunni gegn hryðjuverkamönnum.

Rúmt ár er síðan 39 létust í árás í landinu og er það mat stjórnarandstöðunnar að við þetta ástand verði ekki búið lengur. Að auki létust 22 í árás í mars í fyrra og þrettán í sjálfsvígssprengjuárás í nóvember. Í ofanálag hefur efnahagur landsins mátt muna fífil sinn fegurri.

Pressað hefur verið á Essid að segja af sér síðan forseti landsins, Beji Caid Essebsi, kom fram í ríkissjónvarpi Túnis og gagnrýndi störf hans. Það ávarp átti sér stað í síðasta mánuði.

„Ég mun segja af mér ef vantraust verður samþykkt en ella mun ég halda áfram að starfa fyrir þjóðina,“ hafði Essid látið hafa eftir sér.