Brottflutningur almennra borgara frá Aleppo hafinn á ný

Brottflutningur almennra borgara frá Aleppo er hafinn á ný og er nú unnið að því að koma fólki úr borginni með rútum og sjúkrabílum. BBC greinir frá.

Brottflutningi almennra borgara var frestað eftir að uppreisnarmenn kveiktu í rútum sem áttu að flytja fólk í skjól.

Sýrlensk mannréttindasamtök töldu að ráðist hefði verið á sex rútur og eldur lagður að þeim með þeim afleiðingum að þær brunnu.

Öryggisráð Sameinuðu þjóðanna samþykkti í dag málamiðlun um eftirlit með brottflutningi frá borginni, en þúsundir almennra borgara bíða þess að komast úr borginni og í öruggt skjól.