Gaza, ári eftir stríðið

Ári eftir árásir Ísraels á Gaza er svæðið enn í rústum. Orsök þess er að Ísraelar telja að byggingarefni, líkt og sement, stál og möl, séu ekki æskileg fyrir íbúa Gaza og hafa þeir markvisst unnið að því að hamla innflutningi þessara efna til Gaza en minna en 1% af því sem þarf til endurbyggingar hefur skilað sér. Þessi takmarkaði aðgangur að efnum hefur komið í veg fyrir uppbyggingu heimila sem og annarra húsakynna, líkt og skóla, spítala og fleira sem telst til grunnstoða samfélagsins.

Afleiðingar árása ísraelska hersins voru hörmulegar en eyðilegging var gríðarleg, margir voru drepnir og fjöldi fólks er enn á vergangi. Á meðan árásirnar stóðu yfir glímdi almenningur við þann vanda að finna sér ekki skjól fyrir árásunum, árásum frá her sem gerði ekki greinarmun á almenningi eða hernaðarlegum skotmörkum. Hræðsla hafði ríkan rétt á sér þar sem Ísraelar gerðu óhikað árásir á sjúkrabíla, spítala og skóla, og jafnvel á staði sem höfðu verið sérmerktir af alþjóðlegum samtökum sem skjól fyrir almenning. Í átökunum særðust 83 heilbrigðisstarfsmenn, 21 lét lífið, 16 sjúkrabílar eru ónothæfir eftir árásir og 17 spítalar urðu fyrir alvarlegum árásum og þar af eru 6 sem enn eru óstarfhæfir. Heilbrigðiskerfið var fyrir árásina að hruni komið eftir 8 ára umsátur Ísraels, með takmarkað magn af tækjum, vatni og rafmagni. Gífurlega margir þjást af áfallastreituröskun meðal almennings eftir fyrri árásir ísraelska hersins og hefur sú tíðni hækkað upp úr öllu valdi eftir síðustu árás.

Ísland beiti sér

Yfir 10.000 Palestínumenn særðust í árásunum, á meðal þeirra meira en 3.000 börn. Samkvæmt tölum frá Sameinuðu þjóðunum er áætlað að 2.251 Palestínumaður hafi látið lífið, þar á meðal 260 konur og 551 barn. Nýburadauði tvöfaldaðist á meðan á árásunum stóð og fór frá 7% í 14% á Shifa-sjúkrahúsinu. Talið er að um 4.800 fæðingar hafi átt sér stað meðan á árásunum á Gaza stóð og erfiðar samgöngur gerðu það að verkum að erfitt var fyrir margar þungaðar konur að komast að spítölunum. Mörg þeirra heimila sem voru eyðilögð voru heimili sjúklinga og þegar þeir voru tilbúnir að vera útskrifaðir höfðu margir þeirra ekkert húsaskjól og voru því áfram á yfirfullum spítölum.

Spítalar voru þó enginn griðastaður og þegar ísraelski herinn varpaði sprengju nálægt Al Durra-barnaspítalanum 24. júlí varð spítalinn sjálfur fyrir miklum skemmdum og eyðileggingu. Tveggja ára barn lést í árásinni og um 30 börn til viðbótar særðust en einnig sjö starfsmenn spítalans. Eftir árásirnar var spítalinn talinn ónothæfur.

Samkvæmt Genfarsáttmálanum ber öllum ríkjum að bregðast við og koma í veg fyrir áframhaldandi brot á alþjóðlegum mannréttindalögum. Ísrael hefur ítrekað brotið á mannréttindum Palestínumanna og því þarf að bregðast við. Stjórnvöld á Íslandi verða að beita sér fyrir því af fullum krafti að umsátur og árásir á Palestínu verði stöðvaðar tafarlaust og að Ísraelsmenn verði látnir svara fyrir það grimma ofbeldi sem þeir beita Palestínumenn. Ísrael verður að hætta hernámi, árásum og drápum á Palestínumönnum.