Tapaði fyrir TM eftir sex ára baráttu

Hæstiréttur úrskurðaði í dag Tryggingamiðstöðinni í vil í máli Einars Arnar Jóhannessonar gegn tryggingarfélaginu. Einar Örn lenti í slysi á togaranum Valdimari GK 195 árið 2009 og hefur staðið í deilum við Tryggingarmiðstöðina undanfarin sex ár vegna þess.

Saga Einars Arnar er ótrúleg en eftir slysið var honum sagt að nú tæki við líf sjúklings. Hann hélt þó ekki og hóf nám í læknisfræði og starfar nú sem læknir þrátt fyrir að læknir hans hafi sagt honum á sínum tíma að það væri ómögulegt. Fyrr á árinu var hann í viðtali í Íslandi í dag þar sem hann ræddi slysið, læknisfræðina og baráttuna við Tryggingarmiðstöðina.

Var um borð í bát sem féll í sjóinn eftir að vír slitnaði

Þann 11. júní 2009 varð Einar Örn fyrir slysi um borð í Valdimar GK-195. Slysið vildi þannig til að hífingarvír slitnaði þegar verið var að hífa bát um borð í Valdimar með þá tvo innanborðs. Við það féll léttbáturinn um sjö metra í sjóinn og fóru Einar Örn og skipsfélagi hans á eftir honum. Stefnandi lenti á bakinu ofan í bátnum og féll þaðan í sjóinn en var bjargað af skipsfélögum sínum.

Deila Einar Arnar og Tryggingarmiðstöðvarinnar snerist fyrst og fremst um hvaða launaviðmið bæri að leggja til grundvallar við útreikning bóta fyrir varanlega örorku en ekki var deilt um bótarétt Einars Arnar.

Einar Örn taldi rétt að bæturnar væru miðaðar við þau laun sem hann hafði á þeim degi sem slysið varð en hann hafði þá starfað sem sjómaður í níu mánuði en fram að því unnið margvísleg verkamannastörf frá því að hann lauk framhaldsskólanámi. Byggði hann kröfuna á því að honum hefði líkað sjómannsstarfið vel og hefði hann hagt hug á því starfa við það í framtíðinni.

Hæstiréttur sneri við dómi Héraðsdóms

Tryggingamiðstöðin taldi rétt að miða bæturnar við árslun verkafólks og að engar forsendur væru fyrir því að miða við sjómannslaunin enda hafi Einar Örn aðeins starfað sem sjómaður í níu mánuði. Einar Örn hafi til að mynda ekki haft neina menntun eða starfsréttindi til slíkra starfa og því allt eins líklegt að hann hefði horfið til annarra starfa í framtíðinni.

Héraðsdómur dæmdi í janúar Einari Erni í vil og Tryggingarmiðstöðina til að greiða rúmar 40 milljónir í bætur til Einars Arnar sem metinn var 40 prósent öryrki eftir slysið.

Tryggingarmiðstöðin áfrýjaði og Hæstiréttur hefur nú snúið við dómi Héraðsdóms. Féllst Hæstiréttur á að ekki væri tækt að líta á meðaltekjur sjómanna sem mælikvarða á framtíðartekjur Einars Arnar vegna þess að hann hafði aðeins starfað um skamma hríð sem sjómaður. Því bæri svo á að líta á að Tryggingarmiðstöðin hefði að fullu greitt bætur til Einars Arnars.

Lesa má dóminn í heild sinni hér en hér fyrir neðan má sjá viðtali Sindra Sindrasonar við Einar Örn Jóhannesson.