Óeining innan meirihluta með nýjar bæjarskrifstofur

Óeining er innan meirihluta Sjálfstæðisflokksins í Kópavogi með þá tilhögun að færa bæjarskrifstofur sveitarfélgsins úr gamla miðbænum í Norðurturn Smáralindar. Margrét Friðriksdóttir segir of geyst farið og telur mikilvægt að bæjarskrifstofur sveitarfélagsins verði enn í rótgrónum miðbæ. Birkir Jón Jónsson telur mikilvægara að grynnka á skuldum bæjarins í stað þess að stofna til nýrra skulda.

Engar samningaviðræður eru hafnar milli bæjarins og eigenda fasteignarinnar. Sú tillaga sem var borin upp á síðasta fundi var um að bæjarstjóra yrði falið að hefja samningaviðræður sem myndi síðan verða lagt fyrir bæjarstjórn. Ármann Kr. Ólafsson, bæjarstjóri, segir málið fyrst rætt í október á síðasta ári. „Það hafa ákveðnar þreifingar átt sér stað milli embættismanna bæjarins og fasteignarinnar. Ég hef ekki komið að þeim. Ég hefði viljað á síðasta fundi fá umboð til að hefja viðræður svo málið gæti tekið eitt skref í viðbót,“ segir Ármann. 

„Hér er um gríðarlega mikið hagsmunamál að ræða fyrir íbúa Kópavogs. Sveitarfélagið er eitt það skuldugasta á landinu og því eigum við að kappkosta við að lækka skuldir sveitarfélagsins í stað þess að að auka þær. Þess vegna vil ég skoða málið gaumgæfilega og hef lagt ítarlegar spurningar fyrir bæjarráð þar að lútandi. Það hefur verið stefna þessa meirihluta að lækka skuldir sveitarfélagsins og því vil ég ekki að þessi vegferð verði valin sem hefur þveröfug áhrif,“ segir Birkir Jón Jónsson, bæjarfulltrúi Framsóknarflokksins. 

Margrét Friðriksdsóttir, einn bæjarfulltrúa Sjálfstæðisflokksins tekur í sama streng. „Mér finnst of geyst farið og var í hópi þeirra sem vildi skoða málið betur. Tveir fulltrúar meirihlutans greiddu atkvæði með frestun á síðasta fundi bæjarstjórnar. Skuldir sveitarfélagsins eru háar og því þurfum við að skoða mjög vel hvaða áhrif tilfærslan mun hafa. Ég vil að þetta sé gert faglega og að við gefum okkukr góðan tíma,“ segir Margrét og minnir á að þetta er í raun skipulagsmál einnig. „Við höfum byggt upp fallegan miðbæ með tónlistarhúsi og öðru og því er það mikilvægt að mínu mati að bæjarskrifstofur séu einnig staðsettar í miðbænum.“

Eigendur turnsins eru fjölmargir. Einn eigandi hans er einkahlutafélagið Hjúpur sem er dótturfyrirtæki Byggingarfélags Gylfa og Gunnars, Bygg ehf. Fyrirtækið studdi bæjarstjóra fjárhagslega í prófkjöri fyrir síðustu sveitarstjórnarkosningar. Ármann segir engin tengsl milli sín og þessa fyrirtækis. „Það hryggir mig ef verið er að tengja þetta saman,“ segir Árni. „Ég hef ekki rætt við þessa menn í marga mánuði.