Bara einn eftir í GCD

Athygli hefur vakið að á væntanlegum tónleikum hinnar goðsagnakenndu rokksveitar GCD sem haldnir eru til að heiðra minningu Rúnars Júlíussonar er það aðeins Bubbi Morthens sem koma mun fram af upprunalegum meðlimum sveitarinnar.

Sveitin var stofnuð vorið 1991 af þeim Bubba og Rúnari en aðrir meðlimir voru þeir Gunnlaugur Briem og Bergþór Morthens.

„Þessir tónleikar eru bara eitthvað annað. Bubbi ásamt góðum hljóðfæraleikurum að leika lög GCD en þetta er ekki GCD frekar en Rolling Stones án Keith og Charlie,“ segir Gulli sem lék á trommur með GCD.

„Við erum starfandi tónlistarmenn og þurfum eins og aðrir að lifa og afla tekna. Tónleikar og sýningar í Hörpu eða annars staðar eru ekki bara til að hafa gaman og horfa yfir farinn veg heldur til að setja mat á borðið og bensín á bílinn. Launamálin gengu bara ekki upp, þó svo menn hafi verið allir af vilja gerðir til að semja. Þetta sigldi bara í strand,“ segir hann um ástæður þess að hann og Bergþór leiki ekki með sveitinni á tónleikunum sem haldnir verða þann 11. september í Elborgarsal Hörpu. Pálmi Gunnarsson leikur á bassa á tónleikunum auk fleira tónlistarfólks.

GCD starfaði í þrjú sumur á árunum 1991, 1994 og 1995 og sendi frá sér þrjár plötur. „Þessi hljómsveit gerði saman fullt af flottum lögum og það er það sem skiptir máli, að fólk njóti þessara laga, þó ekki verði þetta týpískur GCD hljómur eða taktur,“ segir Gulli og heldur áfram: „Trommuleikur minn hefur ákveðið sánd og stemmingu sem og snilldargítarleikur Begga Morthens svo ég tali ekki um rödd og nærveru eðaldrengsins Rúnars heitins. Það verður ekki á þessum tónleikum en bara eitthvað öðruvísi og eflaust flott. Á endanum snýst þetta um tónlistina mest. Ég óska gömlu vinum mínum alls hins besta og góðs gengis.“

„Ég vil ekki fara í eitthvert stríð út af þessu en finnst eðlilegt að fólk viti hver mergur málsins er, hvers vegna gamla GCD verður ekki á þessum tónleikum,“ segir Gulli að lokum.

Ekki náðist í Bubba Morthens við vinnslu fréttarinnar í gærkvöldi.