Toneron gefur út sína fyrstu smáskífu í dag

Tveggja manna hljómsveitin Toneron gefur út sína fyrstu smáskífu, Life, í dag en það er eitt af lögunum á væntanlegri fimm laga EP-plötu þeirra félaga sem ber nafnið Toneron.

Hljómsveitina skipa trommuleikarinn Sindri Ágústsson og Gísli Brynjarsson. „Ég er rosalega spenntur og þetta er mjög gaman, maður er líka svolítið stressaður yfir hvernig viðbrögð maður fær. Maður bara fylgir þessu eftir með tónleikum og reynir að njóta þess þegar maður er að spila,“ segir Gísli hress en hann er söngvari og saxófónleikari sveitarinnar, tónlist Torneron má lýsa sem alternative electronic.

Gísli semur meirihluta efnisins en hann hefur þó aldrei lært tónsmíðar en hefur lært á hljóðfæri frá sex ára aldri, í fyrstu á saxófón og síðar fór hann að leika sér á gítar.

„Ég hef ekki lært tónsmíðar, þetta bara þróaðist með því að fikra sig áfram,“ segir hann og bætir við: „Svo fór maður að tileinka sér að taka upp í tölvunni og nota synþa og svona dót. Þá opnaðist nýr og stærri heimur.“

Toneron er rúmlega ársgömul og tók þátt í Músíktilraunum á síðasta ári og komst í úrslit. Í kjölfarið ferðuðust félagarnir ásamt Hinu Húsinu til Þýskalands.

„Þar spiluðum við og kynntumst núverandi umboðsmönnum okkar og einum af tökumönnum tónlistarmyndbandsins,“ segir Gísli en spennandi tímar eru framundan hjá hljómsveitinni.

Síðastliðinn janúar héldu þeir félagar í tónleikaferð til Þýskalands og gerðu í kjölfarið samning við dreifingaraðilann Sportklub Rotter Damm og í framhaldi af því fór tónlistarmyndband við lagið Focus í spilun á þýsku tónlistarveitunni Viva og á þýska MTV.

„Klárlega, þetta er að gera skemmtilega hluti fyri okkur,“ segir Gísli og hlær þegar hann er spurður að því hvort megi segja að Þýskaland sé fyrirheitna landið.

„Þetta er náttúrulega draumurinn að geta verið að semja og vinna við það kannski. Það væri náttúrulega alveg tipp topp eins og maður segir,“ segir Gísli léttur í lundu að lokum.