Strætó fyrirhugar að hækka gjaldskrá

Stjórn Strætó bs. mun taka ákvörðun á stjórnarfundi á morgun um að hækka gjald í strætó um nærri 15 prósent. Gert er ráð fyrir að hækka gjald fyrir fullorðinn úr 350 krónum í 400 krónur og hefur verið unnið að því innan fyrirtækisins í nokkurn tíma. „Endanleg ákvörðun mun liggja fyrir á næsta stjórnarfundi,“ segir Jóhannes Rúnarsson, framkvæmdastjóri Strætó.

Lítið hefur verið fjallað um gjaldskrárhækkanirnar innan stjórnar fyrirtækisins, ef marka má fundargerðir. Síðast var fundað um gjaldskrármál innan stjórnar þann 5. nóvember og tekin sú ákvörðun að tillögu að nýrri gjaldskrá yrði vísað til stjórnenda fyrirtækisins til útfærslu.

Jóhannes segir að verið sé að skoða gjaldskrána í heild sinni. „Það er hugmyndin að hækka fargjaldið upp í 400 krónur en á móti munum við bjóða upp á ný ungmennakort og veita þeim afslátt þannig. Stefnt er að því að ný gjaldskrá taki gildi þann 1. mars næstkomandi.“

Halldór Halldórsson, oddviti sjálfstæðismanna í borginni er ósáttur við þann lýðræðishalla sem birtist í gjörðum byggðasamlagsins Strætó bs.

„Ég fæ þessar fréttir frá þér. Hef séð hvað er bókað 31. október og 5. nóvember en hef ekki frekari upplýsingar. Fundargerðirnar eru lagðar fram í borgarráði en ekkert bókað undir þeim liðum. Það er hugsanlegt að sagt hafi verið frá þessu í borgarráði en mig rekur alls ekki minni til þess. Þetta undirstrikar það sem ég hef áður sagt að það er ákveðinn lýðræðishalli varðandi byggðasamlögin. Borgarfulltrúar eru frekar langt frá þeim, ekki síst minnihlutinn því enginn minnihlutafulltrúi á sæti í stjórnum byggðasamlaga,“ segir Halldór. 

Gunnar Axel Axelsson, bæjarfulltrúi Samfylkingar í Hafnarfirði, undrast þessa tilhögun Strætó bs. „Þessi ákvörðun kemur mér mjög á óvart, enda hefur engin umræða farið fram um málið í sveitarstjórnum þeirra sveitarfélaga sem eiga aðild að Strætó bs. Ég skil ekki þessa ákvörðun og tel hana vanhugsaða,“ segir Gunnar Axel. 

Bryndís Haraldsdóttir, formaður stjórnar Strætó, vildi ekki tjá sig um fyrirhugaðar gjaldskrárhækkanir þegar eftir því var leitað. Taldi hún óráðlegt að ræða við blaðamann um málið áður en stjórn hefði tekið afstöðu til gjaldskrárhækkana.