Guli kafbáturinn sökkti Ronaldo og félögum

Vörn Villarreal hélt stórstjörnum Real Madrid í skefjum þegar liðin mættust á El Madrigal í kvöld.

Aðeins eitt mark var skorað í leiknum en það gerði Roberto Soldado strax á 8. mínútu eftir sendingu Cedric Bakambu.

Leikmenn Real Madrid voru mun meira með boltann og sóttu stíft en tókst ekki að brjóta niður varnarmúr heimamanna. Real Madrid átti alls 19 skot í leiknum en aðeins eitt þeirra fór á markið.

Þetta var þriðja tap lærisveina Rafa Benítez í síðustu fimm leikjum en þeir eru í 3. sæti spænsku úrvalsdeildarinnar með 30 stig, fimm stigum á eftir Barcelona og Atletico Madrid.

Villarreal er hins vegar í 5. sætinu með 27 stig.