Allt niður í fjórtán ára börn í viðskiptum með vopn

Hnífar, sveðjur, hnúajárn og rafbyssur eru á meðal þess sem gengur kaupum og sölum í lokaðri Facebook-síðu sem stofnuð var í síðustu viku. Stofnandi síðunnar er fimmtán ára gamall og eru meðlimir hennar hátt í hundrað talsins. Meðalaldur meðlima er lágur en eftir því sem fréttastofa kemst næst er sá yngsti fjórtán ára.

„Gerði smá grúbbu til að selja butterfly‘s, switchblade, hnúajárn og aðra hnífa og „leikföng“! Addið félögunum. [...] Við minnum á að láta vita ef einhverjir snitchers eru inni á síðunni öryggisins vegna því sumir hnífar eru ólöglegir,“ segir í lýsingu síðunnar, sem rituð var af fimmtán ára stofnanda hennar.

Sífellt færist í aukana að ólöglegur varningur sé seldur á Facebook. Eiturlyf, byssur og sterar eru á meðal þess sem seld eru í fjölmörgum hópum á Facebook og auðvelt er að gerast meðlimur þeirra. Einungis þarf að óska eftir inngöngu eða fá boð í slíka hópa.

Notendur auglýsa ýmist undir nafni eða dulnefni. Stöku sinnum eru símanúmer og staðsetningar auk upplýsinga um varninginn. Þá eru myndböndin jafnan sett inn til að sýna fram á notkun vopnanna, til dæmis rafbyssna.

Greint var frá því á Vísi í gær að ellefu hefðu verið handteknir í aðgerðum lögreglu gegn fíkniefnasölu á Facebook. 

Að sögn lögreglu voru síðurnar sjötíu talsins og notendur skiptu þúsundum. Oft er um að ræða skipulagða starfsemi og oft á tíðum er fleiri en einn bak við hvert notendanafn.

Aldís Hilmarsdóttir, aðstoðarlögreglustjóri á höfuðborgarsvæðinu, lýsti yfir áhyggjum vegna málsins í gær. Á hópunum færu einnig fram kynferðisbrot og að reglulega bærust tilkynningar frá foreldrum og öðrum. Hún hvatti foreldra því til að fylgjast með tölvunotkun barna sinna.