Ná Keflvíkingar og Eyjamenn í sín fyrstu stig? | Heil umferð í Pepsi-deildinni

Heil umferð fer fram í Pepsi-deild karla í kvöld. Þriðja umferðin hefst klukkan 17:00 með leik Fylkis og ÍBV og endar með leik Keflavík og Breiðablik, en hann verður flautaður á klukkan 20:00.

Á Fylkisvelli mætast tvö lið sem hafa ekki byrjað Pepsi-deildina vel. Heimamenn í Fylki hafa einungis fengið tvö stig úr fyrstu tveimur leikjunum og það er rýr uppskera á þeim bænum. Gestirnir úr Eyjum eru hins vegar án stiga og eiga eftir að skora mark.

Íslandsmeistararnir í Stjörnunni halda uppteknum hætti frá því í fyrra og sigurgang þeirra heldur áfram. Rúnar Páll, þjálfari Stjörnunnar, hefur ekki tapað leik sem þjálfari Stjörnunnar í Pepsi-deildinni, en Stjarnan fær nýliða Leiknis í heimsókn í dag. Leiknir vann fyrsta leikinn gegn Val 3-0, en tapaði svo leik númer tvö gegn hinum nýliðunum í ÍA, 0-1.

Víkingar þurfa að keyra Hvalfjörðinn til þess að mæta Skagamönnum, en Ólafur Þórðarson, þjálfari Víkinga, snýr aftur á sinn gamla heimavöll í kvöld. Víkingar hafa farið ágætlega af stað, en þeir eru með fjögur stig af sex mögulegum; sigur gegn Keflavík og jafntefli gegn Val. ÍA er með þrjú stig eftir sigurinn á Leikni í síðustu umferð.

KR er einungis með eitt stig eftir fyrstu tvo leikina og þeir þurfa að safna stigum. Þeir fá fríska Fjölnismenn í heimsókn, en Fjölnir er með fjögur stig eftir leikina tvo. KR náði í sitt fyrsta stig með jafntefli gegn Breiðabliki í síðustu umferð eftir tap gegn FH í fyrstu umferðinni, en Fjölnismenn unnu ÍBV og voru grátlega nálægt því að vinna Fylki í síðustu umferð. Fylkir jafnaði metin í uppbótartíma.

FH, sem er með fullt hús stiga eftir fyrstu tvo leikina, fer á Vodafonevöllinn og mætir þar Val. Hafnarfjarðarliðið hefur unnið KR og Keflavík í fyrstu tveimur umferðunum, en Valsmenn eru einungis með eitt stig eftir tap gegn Leikni og jafntefli gegn Víkingum í síðustu umferð.

Sjónvarpsleikur Stöðvar 2 Sport verður svo í Keflavík þar sem Breiðablik kemur í heimsókn. Keflavík er enn án stiga í Pepsi-deildinni eftir töp gegn FH og Víking, en Breiðablik heldur áfram að gera jafntefli frá því í fyrra. Liðið er með tvö stig eftir tvö jafntefli í fyrstu tveimur umferðunum.

Útsending frá leiknum hefst klukkan 19:30, en leikurinn sjálfur hefst klukkan 20:00. Öllum leikjunum verður að sjálfsögðu lýst í beinni textalýsingu á Vísi og þetta verður svo allt gert upp í Pepsi-mörkunum með Herði Magnússyni og félögum á Stöð 2 Sport klukkan 22:00 í kvöld.

Leikir dagsins:

17.00 Fylkir - ÍBV (Fylkisvöllur)

19.15 Stjarnan - Leiknir R. (Samsung-völlurinn)

19.15 ÍA - Víkingur (Norðurálsvöllurinn)

19.15 KR - Fjölnir (KR-völlur)

19.15 Valur - FH (Vodafonevöllurinn)

20.00 Keflavík - Breiðablik (Nettóvöllurinn)