Keflavík samdi við enskan miðvörð

Keflavík hefur fengið góðan liðsstyrk fyrir síðari hluta tímabilsins í Pepsi-deild karla en félagið hefur gengið frá samningum við Paul Bignot, 29 ára enskan varnarmann.

Bignot semur við Keflavík til loka tímabilsins en Þorsteinn Magnússon, formaður knattspyrnudeildar Keflavíkur, segir að um hreinræktaðan miðvörð sé að ræða.

„Þjálfurunum líst mjög vel á hann og við teljum að hann geti styrkt vörnina okkar,“ sagði Þorsteinn við Vísi. „Hann var mjög spenntur fyrir því að spila á Íslandi.“

Bignot er uppalinn hjá Crewe en hefur einnig leikið með Kidderminster, Newport, Plymouth og Grimsby. Hann samdi við Blackpool árið 2011 er liðið var nýfallið úr ensku úrvalsdeildinni en náði ekki að spila leik með liðinu.

Bignot hefur verið án félags síðan í vor eftir að hafa spilað með Grimsby í tvö ár í ensku utandeildinni.

Keflavík þarf sárlega á styrkingu að halda enda liðið í neðsta sæti Pepsi-deildar karla með aðeins fimm stig að loknum tólf umferðum. Liðið steinlá fyrir Keflavík, 7-1, í síðustu umferð.

„Stefnan er að halda okkur uppi,“ sagði Þorsteinn sem útilokaði ekki að styrkja leikmannahópinn enn frekar í júlíglugganum. „Þetta fer að verða nokkuð gott en það er aldrei að vita.“

Keflavík hefur þegar fengið þá Farid Zato og Chukwudi Chijindu til sín í mánuðinum.