Heiftúðugar deilur fari í sáttafarveg

Katrín Júlíusdóttir, þingmaður Samfylkingarinnar, segir deilurnar um Reykjavíkurflugvöll orðnar svo heiftúðugar að þær verði að setja í sáttafarveg. Höskuldur Þórhallsson, formaður umhverfis- og samgöngunefndar Alþingis, segir að fá þurfi óháðan erlendan aðila til að fara yfir áhættumat vegna lokunar flugbrautar.

Deilurnar þessa dagana snúast einkum um hvaða áhrif lokun minnstu brautarinnar hafi á öryggi flugvallarins, en sérstakur áhættumatshópur, sem Isavia fól verkefnið, skipaður fulltrúum flugrekstraraðila, var settur af í byrjun desember. Fulltrúar í áhættumatshópnum hafa síðan sakað Isavia um að draga taum flugvallarandstæðinga.

Umhverfis- og samgöngunefnd Alþingis tók málið fyrir á fundi sínum í morgun og fékk til sín annarsvegar fulltrúa úr áhættumatshópnum brottrekna og hinsvegar fulltrúa frá Isavia.

„Við erum að tala um annarsvegar eitt mikilvægasta samgöngumannvirki landsins, við erum að tala um flugöryggi, og mér fannst rétt að Isavia fengi að svara fyrir þær ásakanir sem hafa komið fram og útskýra afhverju hópurinn var settur af,“ sagði Höskuldur Þórhallsson, formaður þingnefndarinnar.

„Því miður þá vakna það margar spurningar eftir fundinn í dag að ég hef áhyggjur af gangi mála varðandi Reykjavíkurflugvöll.“ 

 Höskuldur telur að fá þurfi óháðan erlendan aðila til að meta áhættumatið fyrir brautina umdeildu. 

„Þannig að við getum algerlega gengið úr skugga um að við séum ekki að stíga skref sem stofna innanlandsflugi eða sjúkraflugi í hættu.“ 



-Ertu að segja að þú treystir ekki mati Isavia? 

„Ja.. eftir þessar ásakanir - og það að mér fannst þeir ekki geta útskýrt það nægilega vel afhverju þessi hópur var lagður til hliðar - og ef það er einhver tortryggni í þessu máli þá held ég að það sé rétt að fá annan aðila til að meta áhættumatið,“ sagði Höskuldur. 

Katrín Júlíusdóttir er varaformaður umhverfis- og samgöngunefndar Alþingis og hennar viðbrögð eftir fundinn í dag voru þessi: 

„Þessar deilur hafa staðið mjög lengi og þær eru orðnar mjög heiftúðugar. Ég er komin á þá skoðun að við eigum núna öll aðeins að anda í kviðinn og bíða eftir niðurstöðu hinnar svokölluðu Rögnunefndar, sem er sáttaferill sem settur var á laggirnar milli ríkis og borgar. 

Og síðan skulum við taka upp þráðinn þegar sú niðurstaða liggur fyrir. Þar eru menn að vinna vel með öll gögn á borðinu og eru að reyna að leggja faglegt mat og líka gott pólitískt mat varðandi samfélagsþróunina til grundvallar faglegri ákvarðanatöku. Og ég er þeirrar skoðunar að við eigum að bíða eftir því,“ sagði Katrín.