Biggi lögga tilkynnir lendingu á Mars

Birgir Örn Guðjónsson, sem betur er þekktur sem Biggi lögga, er þegar þjóðkunnur fyrir greinaskrif sín og svo það að bregða á leik á internetinu.

Það má segja að hann bregði sér í hlutverk flugþjóns í nýju myndbandi sem vakið hefur mikla lukku. Þar tilkynnir hann lendingu á Mars minnir hann farþega á að vera með beltin spennt og sætisbökin upprétt eins og gert er í flugvélum við flugtak og lendingu. Þá minnir hann reyndar farþega líka á að vera með ökuljósin kveikt.

„Fyrir hönd lögreglunnar á höfuðborgarsvæðinu þakka ég ykkur fyrir ánægjulega samfylgd í skammdegi síðustu mánaða og ég vona að þið njótið komandi tíma með hækkandi sól úti, inni og í sinni.“

Óhætt er að segja að viðtökurnar hafi verið góðar því vel á 12. þúsund hafa horft á atriðið.



Biggi lögga er þó ekki óumdeildur. Þannig vakti síðasta frásögn hans nokkurn usla en þá sagðist hann hafa hitt ungling með kanabisolíu og var í kjölfarið sakaður um að afvegaleiða umræðuna. Biggi sagði þá, í samtali við Vísi:

„Ég er ekki einhver karakter sem er búinn til af lögreglunni í einhverri „ímyndarherferð“. Það sem ég segi kemur allt úr mínum eigin kolli. Ég er í löggunni aðallega út af því að ég vil hjálpa fólki og vegna þess að ég hef hugsjón fyrir bættu samfélagi.“

Post by Lögreglan á höfuðborgarsvæðinu.