Slökkviliðsmenn vilja að stjórnin sýni Kristjáni umburðarlyndi og semji við hann

Slökkviliðsmenn hjá Brunavörnum Árnessýslu hafa þungar áhyggjur af þróun mála hjá BÁ undanfarnar vikur varðandi stöðu yfirmanns liðsins.

Eins og Vísir hefur fjallað um var slökkviliðsstjóranum Kristjáni Einarssyni sagt upp störfum um miðjan október en ástæðan var bakgreiðslur til Kristjáns og aðstoðarslökkviliðsstjóra sem stjórnin taldi ekki hafa verið veitt heimild fyrir.

80 slökkviliðsmenn hjá BÁ hafa skrifað undir áskorun til stjórnar Brunavarna Árnessýslu og Héraðsnefndar Árnessýslu þar sem skorað er á að umburðarlyndi verði sýnt í málinu.

Vilja þeir að samið verði við báða slökkviliðsstjórana um „viðunnandi málalyktir varðandi þeirra mál hjá BÁ“.

Er það skoðun þeirra að núverandi slökkviliðsstórar hafi með elju og vinnusemi á liðnum árum skapað eitt öflugasta og samheldnasta slökkvilið landsins svo eftir sé tekið.

Hverfi þeir frá störfum muni það raska starfsemi slökkviliðsins til langs tíma með ófyrirséðum afleiðingum og kostnaði.

Uppfært klukkan 13:50

Í fyrri útgáfu stóð a 52 slökkviliðsmenn hefðu skrifað undir. Hið rétta er að 80 skrifuðu undir áskorunina.