Kjalölduveita send beint í verndarflokk

Verkefnastjórn rammaáætlunar hefur ákveðið að taka virkjunarkostinn Kjalölduveitu ekki til meðferðar í 3. áfanga. Það er niðurstaða verkefnastjórnarinnar að Kjalölduveita sé eingöngu önnur útfærsla af Norðlingaölduveitu. Landsvirkjun hefur tekið málið upp á vettvangi umhverfis- og auðlindaráðuneytisins og hafnar því að verkefnastjórnin geti tekið ákvörðun sem þessa enda sé um lögbrot að ræða.

Haldinn var kynningarfundur um stöðu 3. áfanga rammaáætlunar í gær þar sem framvinda vinnu við rammaáætlun, staða hennar og vinnan fram undan var til umræðu. Víða var komið við en í máli sínu vék Stefán Gíslason, formaður verkefnastjórnarinnar, stuttlega að þessari ákvörðun um flokkun Kjalölduveitu.

„Var tekin ákvörðun um að taka Kjalölduveitu ekki til mats þar sem um væri að ræða útfærslu af Norðlingaölduveitu, sem væri í verndarflokki – þannig að hún lendir í raun og veru í verndarflokki með Norðlingaölduveitu.“

Fréttablaðið fjallaði um það þegar Kjalölduveita var kynnt til sögunnar í janúar. Þá fullyrtu Landvernd og fleiri að Kjalölduveita væri ekkert annað en Norðlingaölduveita í dularbúningi. Þá sagði formaður verkefnastjórnarinnar, spurður hvort fjallað yrði um Kjalölduveitu: „Sé þetta ný hugmynd eða mjög breytt útfærsla á Norðlingaölduveitu verður væntanlega fjallað um þetta. Annars ekki.“

Hörður Arnarson, forstjóri Landsvirkjunar, segir fyrirtækið ósammála málsmeðferð verkefnastjórnarinnar, og að það sé Orkustofnun einnig. „Við teljum að verkefnastjórninni beri að fjalla um þennan kost, sem og aðra sem Orkustofnun telur að eigi að fjalla um. Við teljum í raun að þessi afgreiðsla stangist á við lög og höfum mótmælt henni við umhverfisráðherra,“ segir Hörður og bætir við að ákvörðunin samræmist ekki grundvallarreglum stjórnsýsluréttar. Fyrirtækinu hafi ekki gefist kostur á andmælum og ekki sé ætlast til þess að ráðgefandi nefnd eins og verkefnastjórnin taki ákvarðanir sem þessa. Umhverfisráðherra hafi verið beðinn um að skýra umboð verkefnastjórnarinnar vegna málsins.

Hörður hnykkir á því að Kjal­ölduveita sé nýr virkjunarkostur og aldrei hafi verið fjallað um hann og með höfnun sem þessari hafi verkefnastjórnin tekið ákvörðun þvert á hlutverk sitt. Hörður segir jafnframt að ekkert hafi verið skoðað hvað það þýðir fyrir Landsvirkjun ef ákvörðun verkefnastjórnarinnar stendur og bæði Kjalölduveita og Norðlingaölduveita verði áfram í verndarflokki. „Við treystum því einfaldlega að verkefnastjórnin fari að lögum.“