Á þriðja hundrað með í málinu gegn Björgólfi

„Með þessari hópmálsókn er stigið mikilvægt skref í átt að aukinni vernd fyrir fjárfesta á Íslandi. Það er mikilvægt að allir þeir sem taka þátt í viðskiptum með hlutabréf veiti stjórnendum og eigendum þessara félaga raunverulegt aðhald og kalli þá til ábyrgðar,“ segir Vilhjálmur Bjarnason alþingismaður um stefnu málsóknarfélags á hendur Björgólfi Thor Björgólfssyni.

Stefnan verður þingfest á morgun. Á sama tíma verður lagður fram listi yfir þá sem taka þátt í málsókninni. Þátttakendur eru núna 207 talsins, en þeir sem að málsókninni standa telja að fleiri muni bætast í hópinn.

Á meðal þeirra eru Karen Millen, Kristján Loftsson í Hval, Bolli Héðinsson hagfræðingur, Svana Helen Björnsdóttir, fyrrverandi formaður Samtaka iðnaðarins, Lífeyrissjóður verkfræðinga, Lífeyrissjóður starfsmanna íslenskra sveitarfélaga og fleiri. Áður hafði verið greint frá aðkomu Vilhjálms Bjarnasonar alþingismanns og lífeyrissjóðsins Stapa að málinu.

Málsóknarfélagið telur að Björgólfur Thor hafi með saknæmum hætti leynt upplýsingum um eignarhald sitt á Landsbankanum til að komast undan reglum um birtingu upplýsinga um viðskipti bankans við hann. Þau viðskipti hafi verið umfangsmikil og langt yfir þeim mörkum sem Fjármálaeftirlitið heimilaði. Þá byggir félagið málatilbúning sinn á því að Samson eignarhaldsfélag, sem var í eigu Björgólfs og föður hans, hafi allt frá árinu 2006 ráðið yfir meirihluta atkvæða í Landsbanka Íslands hf. og því hafi félagið haft skyldu til að gera öðrum hluthöfum yfirtökutilboð. Þetta hafi komið í ljós eftir að upplýst varð um umfangsmikil kaup Landsbankans á eigin bréfum sem meðal annars voru geymd í aflandsfélögum sem lutu stjórn bankans.

Þegar fréttir voru sagðar af málshöfðuninni sendi Björgólfur Thor Björgólfsson fjölmiðlum yfirlýsingu þar sem hann varaði hugsanlega þátttakendur í málsóknarfélaginu við miklum kostnaði sem þeir myndu þurfa að bera af henni. „Leiði rangar ásakanir lögmanna í minn garð til tjóns bera félagsmenn óskipta ábyrgð á hugsanlegum bótum. Þeir sem hafa hæst í málinu fría sig þannig ábyrgð á kostnað almennra hluthafa,“ sagði Björgólfur.

Í lögfræðiáliti sem Ragnar H. Hall hæstaréttarlögmaður hefur gert fyrir málsóknarfélagið hafnar Ragnar því að Björgólfur geti sótt bætur til félagsmanna vegna rangra sakargifta. „Um ábyrgð á yfirlýsingum lögmanna undir rekstri máls fer annars eftir almennum reglum – lögmenn geta eins og aðrir bakað sér ábyrgð með orðum sínum og framgöngu. Undirritaður fær ekki séð hvernig slíkt geti beint snert félagsmenn í hópmálsóknarfélagi sem lögmaðurinn vinnur fyrir,“ segir í áliti Ragnars.