Di Maria feginn að vera farinn frá Englandi | „Fjölskyldunni leið illa“

Angel di Maria, leikmaður Paris Saint-Germain segist vera feginn því að vera laus frá Englandi eftir eitt ár í herbúðum Manchester United en hann gekk til liðs við frönsku meistarana í sumar.

Di Maria sem gekk til liðs við Manchester United fyrir tæplega 60 milljónir punda frá Real Madrid síðastliðið sumar byrjaði tímabilið af miklum krafti. Það fjaraði hinsvegar fljótlega undan honum og sat hann mikið á bekknum síðustu mánuðina.

Di Maria mætti ekki til æfinga hjá Manchester United í sumar og fór ekkert í felur með að hann vildi fara frá félaginu. Greindi hann frá því í viðtali á dögunum að honum og fjölskyldunni hefði liðið illa á Englandi en brotist var inn til hans á sínum tíma.

„Síðasta ár var erfitt, innan sem utan vallar. Ég spilaði lítið og þurfti að horfa á Meistaradeildina í sjónvarpinu stuttu eftir að hafa verið í sigurliðinu. Fjölskyldunni leið líka illa, okkur leið ágætlega í byrjun en hlutirnir urðu erfiðir. Það er erfitt fyrir fólk frá Suður-Ameríku að vera á Englandi.“

„Ég átti í erfiðu sambandi við þjálfarann sem gerði þetta að auðveldri ákvörðun. Ég gat ekki verið áfram eftir að brotist var inn til mín, fjölskyldunni minni og sérstaklega dóttur minni leið illa. Lífið í Frakklandi minnir mig meira á lífið á Spáni og Portúgal og fjölskyldan er mjög ánægð hérna.“