Memphis stimplaði sig inn með látum | Sjáðu mörkin

Memphis Depay var í aðalhlutverki þegar Manchester United vann 3-1 sigur á Club Brugge í fyrri leik liðanna í umspili um sæti í riðlakeppni Meistaradeildar Evrópu í kvöld.

Depay skoraði fyrstu tvö mörk United með frábærum skotum en þetta voru fyrstu mörk hans fyrir félagið. Hann lagði svo upp þriðja markið fyrir varamanninn Maraoune Fellaini.

Brugge náði forystunni á 8. mínútu þegar Michael Carrick setti boltann í eigið mark eftir aukaspyrnu Victors Vasquez. En aðeins þremur mínútum seinna jafnaði Depay metin með góðu skoti eftir flottan einleik.

Hollendingurinn var svo aftur á ferðinni tveimur mínútum fyrir hálfleik þegar hann klíndi boltanum í fjærhornið með skoti fyrir utan vítateig.

United sótti stíft í seinni hálfleik en þriðja markið lét bíða eftir sér. Það kom loks á fjórðu mínútu í uppbótartíma þegar Fellaini skallaði fyrirgjöf Depay í markið.

Mark Fellaini gæti reynst afar mikilvægt en seinni leikurinn fer fram í Belgíu á miðvikudaginn í næstu viku.

Mörkin úr leiknum má sjá hér að neðan.

Man Utd 0-1 Club Brugge Man Utd 1-1 Club Brugge Man Utd 2-1 Club Brugge Man Utd 3-1 Club Brugge