Mótmæli fyrir utan tannlæknastofu ljónaslátrara

Um 100 manns mættu fyrir utan tannlæknastofu Walter James Palmer til þess að mótmæla drápi hans á ljóninu Cecil og veiðum á dýrum í útrýmingarhættu.

Tannlæknastofan hefur verið lokuð auk þess sem að dýravinir hafa breytt henni í minnisvarða um Cecil.

Í orðsendingu til viðskiptavina sinna harmaði tannlæknirinn Palmer þá röskun sem orðið hafi á þjónustu stofunnar en ítrekaði fyrri yfirlýsingu sínu um að veiðin hafi verið lögleg. Lofaði hann að aðstoða yfirvöld í Zimbabwe og Bandaríkjunum við rannsókn málsins.

Sjá einnig: Drápið sem gerði allt vitlaust.

Tveir menn sem aðstoðuðu Palmer við veiðina hafa verið handteknir í Zimbabwe og vilja yfirvöld þar í landi ná tali af Palmer. Hafa þau gefið út að Palmer og félagar hafi ekki haft tilskilin leyfi. Ekki er vitað nákvæmlega hvar Palmer heldur sig.