Silfurhringur og snældusnúðar meðal þess sem upp hefur komið við Lækjargötu

Ýmis konar minjar hafa fundist í fornleifauppgreftrinum við Lækjargötu, þar sem talið er að skáli hafi staðið á landnámstímanum. Lilja Björk Pálsdóttir, fornleifafræðingur hjá Fornleifastofnun Íslands, segist búast við því að meira komi upp á næstu dögum þegar farið verður að vinna í gólfi skálans.

„Við erum að vonast til að fá einhverja gripi eða bein sem við getum aldursgreint nánar,“ segir Lilja Björk. „Þangað til eru svona ákveðnar vísbendingar um að þetta sé frá fyrstu tíð. En það er erfitt að segja svona í miðjum uppgreftri, því ýmislegt á eftir að koma í ljós.“

Meðal þess sem komið hefur í ljós í greftrinum eru fjórir snældusnúðar, sá síðasti í gær. Þeir fundust allir í skálanum þegar verið var að hreinsa svokölluð yfirborðslög, lög sem urðu eftir milli þess sem skálinn var yfirgefinn og bærinn Lækjarkot var reistur árið 1799, í burtu.

Sjá einnig: Óvæntur fornleifafundur breytir byggðasögu Reykjavíkur

„Snældusnúður er notaður til þess að vinna band,“ útskýrir Lilja Björk. „Þeir finnast mjög oft við svona uppgrefti. Þeir geta verið af mismunandi stærð og lögunin getur líka verið örlítið kantaðri. Það er oft talað um að hægt sé að tímasetja út frá stærðinni á gatinu en við förum frekar eftir jarðlögunum sem þetta finnst í. Því svona efni getur verið í notkun í lengri tíma og svolítið erfitt að tímasetja nákvæmlega út frá því.“

Heimir Már Pétursson, fréttamaður Stöðvar tvö, mætti á svæðið í gær.

Í uppgreftrinum hafa einnig fundist silfurhringur, sem lítið er vitað um að svo stöddu, og nokkur brýni, semsagt búnaður til að brýna hnífa og slíkt. Brýnin eru meðal annars merkileg fyrir þær sakir að þau eru úr innfluttu norsku grjóti, sem hægt er að tímasetja til fyrri hluta landnáms á Íslandi.

Gjóskulögin sem finnast í veggjum skálans eru aðallega úr gjósku sem féll árið 871, en tveimur árum getur munað til eða frá. Lilja segir að ekki sé hægt að segja til um það að svo stöddu hvort skálinn hafi verið byggður fimmtíu eða tvö hundruð árum á eftir, en tímaramminn mun þrengjast þegar hægt verður að aldurgreina fleiri muni.