Vill senda Viðreisnarrútuna í hringferð um landið

„Ég finn að stefnumál okkar hafa mikinn hljómgrunn meðal almennings,“ sagði Benedikt Jóhannesson framkvæmdastjóri á stefnumótunarfundi nýja stjórnmálaaflsins Viðreisnar á Grand Hótel í Reykjavík í dag. „Fólk kemur oft upp að mér úti á götu og spyr hvenær flokkurinn verði stofnaður. Það er allavega skemmtilegra en hitt, það sem fólk segir um gömlu flokkana: Hvenær verður þessi flokkur lagður niður?“

Um hundrað manns sóttu fundinn í dag þar sem fram fór stefnumótunarvinna fyrir Viðreisn, sem til stendur að stofna formlega sem stjórnmálaflokk snemma á næsta ári. Gestum var skipt niður á borð þar sem umræður fóru fram um málaflokka á borð við heilbrigðis-, utanríkis- og menntamál og hverju borði ætlað að skila af sér tillögum að stefnu í þeim málaflokki.

Benedikt, sem helst hefur verið í forsvari fyrir Viðreisn frá því að aflið hóf að undirbúa framboð í fyrra, sló á létta strengi í stuttu ávarpi áður en vinna hófst meðal viðstaddra. Gagnrýndi hann vinnubrögð stjórnvalda í ýmsum stórum málum það sem af er kjörtímabili, ekki síst ítrekaðar tilraunir til að afturkalla ESB-umsókn Íslendinga, og sagði núverandi ríkisstjórn samanstanda af einum íhaldsflokki og einum afturhaldsflokki.

„Afturhaldsflokki sem vill að ungir, íslenskir arkitektar setji sig í samband við framliðinn arkitekt og ljúki við teikningar hans frá árinu 1918,“ sagði Benedikt og uppskar hlátrasköll. Vísaði hann þar til tillögu forsætisráðherra um að reisa nýja skrifstofubyggingu Alþingis samkvæmt gömlum teikningum Guðjóns Samúelssonar.

Yfirskrift fundarins var „Frjálslyndi og víðsýni“ og sagði Benedikt að flokkurinn myndi leggja áherslu á markaðslausnir. Nokkrir þekktir aðilar úr viðskiptalífinu mættu á fundinn í dag, meðal annars Kristín Pétursdóttir, stjórnarformaður Auðar Capital og Virðingar, og Vilhjálmur Egilsson, rektor háskólans á Bifröst og fyrrverandi framkvæmdastjóri Samtaka atvinnulífsins, sem var fundarstjóri.

Í máli Benedikts kom fram að til stendur að kynna stefnumál Viðreisnar um land allt áður en kosið verði um skipulag flokksins í haust og hann formlega stofnaður á næsta ári. Grínaðist hann í því samhengi um að senda „Viðreisnarrútuna“ hringinn í kringum landið og líkti því við ferðalag Stuðmanna í kvikmyndinni Með allt á hreinu.