Risaslagur hjá stelpunum í sextán liða úrslitunum

Íslands- og bikarmeistarara Stjörnunnar drógust á móti Breiðablik í 16 liða úrslitum Borgunarbikarsins en dregið var í hádeginu.

Stjarnan og Breiðablik var spáð tveimur efstu sætunum í Pepsi-deildinni í sumar og hafa bæði unnið leiki sína í tveimur fyrstu umferðunum.

Það var Ásgerður Stefanía Baldursdóttir sem tók Breiðablik upp úr hattinum en þá voru sjö kúlur enn eftir.

Stjarnan vann Breiðablik 1-0 í undanúrslitum keppninnar í fyrra og fór síðan alla leið og varð bikarmeistari.

Liðin hafa þegar mæst í tveimur úrslitaleikjum á þessu tímabili en Stjarnan hafði betur bæði í úrslitaleik Lengjubikarsins sem og í Meistarakeppni KSÍ.

Það eru tveir aðrir Pepsi-deildar slagir í sextán liða úrslitunum en þar mætast einnig Þróttur- Vlur og KR-Afturelding.

16 liða úrslit Borgunarbikars kvenna:

Þróttur R. - Valur

Þór/KA - ÍA

Fylkir - Haukar

Augnablik - Grindavík

Stjarnan - Breiðablik

KR - Afturelding

ÍBV - HK/Víkingur

Selfoss - Völsungur