Eitt skot og mark hjá Aroni og Altidore í Árósum

Aron Jóhannsson skoraði annað mark Bandaríkjanna í 3-2 tapi fyrir Danmörku í vináttuleik í gærkvöldi sem fram fór á hans gamla heimavelli í Árósum.

Aron var að spila sinn fyrsta landsleik síðan hann kom inn á sem varamaður í fyrri hálfleik gegn Gana í fyrsta leik Bandaríkjanna á HM í fyrra.

Markið skoraði Aron á 66. mínútu og kom Bandaríkjunum í 2-1, en félagi hans í framlínunni, Jozy Altidore, kom Bandaríkjunum í 1-0 áður en Nicklas Bendtner jafnaði metin. Bendtner skoraði þrennu og innsiglaði sigur Dana.

Aron og Altidore skutu báðir aðeins einu sinni að marki og skoruðu báðir. Hundrað prósent nýting hjá framherjunum. Aron spilaði 67 mínútur í leiknum en Altidore, sem er kominn aftur í MLS-deildina eftir skelfilega daga hjá Sunderland í ensku úrvalsdeildinni, spilaði allan leikinn.

Enginn annar framherji eða miðjumaður Bandaríkjanna sem tók þátt í leiknum kom skoti að marki. Varnarmaðurinn John Brooks skaut tvisvar að markinu en hitti það í hvorugt skiptið.

Sóknarleikur bandaríska liðsins hefur verið gagnrýndur undanfarin misseri en fjölmiðlar vestanhafs skrifuðu um það í gær að Altidore og Aron hafi náð vel saman.

Nicklas Bendtner skoraði þrjú mörk úr fjórum skotum sem voru einu fjögur skot Dana á markið. Nick Rimando stóð vaktina í marki Bandaríkjanna í fjarveru Tims Howards, markvarðar Everton, sem er í fríi frá landsliðinu.

Hér að neðan má sjá mörkin sem Altidore og Aron skoruðu í gær úr einu skotum Bandaríkjanna á mark Dana. Heildartölfræði leiksins má finna hér.

Altidore 0-1: Aron Jóhannsson 1-2: