Týpuhúfur í takmörkuðu upplagi

„Fyrirtækið 66°Norður bað mig um að gera sérstaka útgáfu af þessari húfu sem er bara seld yfir HönnunarMars,“ segir Þórunn Árnadóttir vöruhönnuður sem hefur hannað nýja útgáfu af hinni klassísku húfukollu.

Húfan hefur átt miklum vinsældum að fagna á síðastliðnum árum hjá hópi sem oft er kenndur við hipstera, en fyrst eftir að hún kom á markaðinn, fyrir rúmum fimmtíu árum, prýddi hún einkum höfuð sjó- og vinnumanna.

„Það þekkja náttúrulega allir þessa húfu, þetta er í rauninni húfa sem er búin að vera hjá okkur í áratugi og sjóarar og vinnumenn hafa verið með í gegnum tíðina,“ segir Fannar Páll Aðalsteinsson, markaðsstjóri 66°Norður.

„Það var frekar auðvelt, svona þegar ég fór að spá í hvaðan 66°Norður kemur og uppruna húfunnar þá langaði mig að vinna eitthvað með það og fór að skoða Reykjavíkurhöfn. Mynstrið er eigin­lega Reykjavíkurhöfn,“ segir Þórunn þegar hún er spurð að því hvort það hafi ekki verið erfitt að taka svo þekkta hönnun og gera nýja útgáfu.

„Ég vona að hún verði vinsæl,“ segir Þórunn glöð í bragði og bætir við: „Þetta eru þrjár nýjar týpur og eitt mynstrið er í tveimur litum.“ Mynstrið sem innblásið er af Reykjavíkurhöfn kemur í tveimur litum, ljósbleikum og bláum, en hin týpan er dökkblá í grunninn og er mynstrið sem prýðir hana vísun í Pyropet-kerti Þórunnar.

Það er nóg um að vera hjá Þórunni þessa dagana því auk húfunnar góðu er væntanlegt nýtt kerti í Pyropet-línuna. „Það er fugl sem er að koma núna í lok mars byrjun apríl, ég ætla að sýna fyrstu eintökin af honum núna á HönnunarMars.“

Kertin nutu mikilla vinsælda þegar þau komu út á síðasta ári. Fyrstu kertin voru í formi katta og þegar kveikt er á kertinu birtist smátt og smátt beinagrind sem er jafnframt hið mesta stofustáss.

„Fuglinn kemur í tveimur nýjum litum, mintugrænum og gulum,“ segir hún en fleiri dýrategundir eru væntanlegar í Pyropet-línunni. „Hann er töluvert minni, bara svona lítill smáfugl, eiginlega í raunstærð.“ Pyropet-kertin verður hægt að berja augum í verslunum víða og verður kveikt á einu kerti á hverjum degi HönnunarMars, en fuglinn kemur í sölu um mánaðamótin mars-apríl.

Húfurnar eru framleiddar í takmörkuðu upplagi og verða einungis seldar í verslun 66°Norður í Bankastræti.