Skipulagði innlimun Krímskaga löngu fyrir atkvæðagreiðslu

Vladimir Putin Rússlandsforseti hefur nú í fyrsta sinn viðurkennt að ákvörðun hafi verið tekin um innlimun Krímskaga nokkrum vikum fyrir atkvæðagreiðsluna um framtíð landsvæðisins.

Krímskagi varð formlega hluti af Rússlandi þann 18. mars á síðasta ári. Ákvörðunin vakti mikla reiði alþjóðasamfélagsins og var hún fordæmd af stjórnvöldum í fjölmörgum ríkjum.

Í frétt BBC segir að Pútín greini frá þessu í nýrri heimildarmynd sem brátt verður frumsýnd.

Þar kemur fram að hann hafi fyrirskipað vinnu að því að „endurheimta Krím“ að loknum fundi þann 22. febrúar. Boðað var til fundarins eftir að Viktor Janúkóvitsj var hrakkinn úr embætti forseta Úkraínu og vildi Pútín tryggja öryggi Janúkóvitsj.