Gagnrýnir gjaldskrárhækkanir Art Medica

Fólk er svo sannarlega heppið að þurfa ekki á ykkur að halda,“skrifar Valborg Rut Geirsdóttir á Facebook þar sem hún gagnrýnir hækkanir á gjaldskrá fyrirtækisins Art Medica sem er eina stöðin sem sinnir tæknifrjógvunum hér á landi. Valborg segir í samtali við Vísi að hún hafi tekið þá meðvituðu ákvörðun árið 2012 að verða ein – stök móðir tæknibarns.

Hún fór í sína fyrstu meðferð hjá Art Medica í maí árið 2013. Nokkrum meðferðum seinna, í júní árið 2014, varð hún ólétt en það var þó skammvinn gleði þar sem sonur hennar fæddist andvana eftir 29 vikna meðgöngu.

Safnar hverji einustu krónu fyrir glasameðferð

Síðustu mánuði hefur hún unnið að því að eignast annað barn en hún segist safna hverri einustu krónu til að eiga fyrir glasameðferð.

„Ég eyði sjaldan sem aldrei í vitleysu eða óþarfa. Ég borða í vinnunni og fer varla í búð til að fylla á matarbirgðir á heimilinu mínu. Ég hef svo mörgum sinnum borðað súrmjólk eða hafragraut heilu dagana síðustu þrjú árin. Mér finnst hafragrautur ógeðslegur, en það er stundum það eina sem ég hef efni á á meðan ég er að skrapa saman fyrir næstu tæknitilraun. Ég hef aldrei kvartað. Því ég er til í að leggja á mig svo ótal margt fyrir lítið kraftaverk. En stundum, eins og núna, er ekki hægt að þegja,“ segir Valborg í pistlinum sem birtist á Facebook.

Hækkaði nýverið um 37 þúsund krónur

Hún bendir á að glasameðferð sem kostaði 376 þúsund krónur fyrir tíu dögum hefur nú hækkað í 413 þúsund krónur, sem er 37 þúsund króna hækkun, og munar um minna fyrir þá sem þurfa að leggja hverja einustu krónu fyrir í þeirri von um að geta eignast barn.

„Mig langar til að þess að gráta. Art Medica er eina fyrirtæki sinnar tegundar á landinu. Við getum ekki leitað annað nema þá erlendis, sem þó hefur færst verulega  í aukana að fólk geri. Að það sé virkilega hægt að hafa samvisku í að eiga alla þessa peninga, bjóða uppá þjónustu sem er mjög svo ábótavant, tæki sem alls ekki eru það nýjasta í dag og vita að fólkið sem til þeirra leitar á oft mjög margt í erfiðleikum með að skrapa saman fyrir hverri meðferð þykir mér hreint út sagt ótrúlegt,“ skrifar Valborg.

„Vona svo mikið að þetta væri djók“

Hún vekur athygli á ársreikningi Art Medica frá árinu 2013 og bendir til að mynda á að eigið fé fyrirtækisins þá nam 271  milljón króna og að eigendurnir tveir greiddur sér 44 milljónir í arð það ár. Hagnaður fyrirtækisins voru rúmar 82 milljónir króna og tækin sem fyrirtækið býr yfir voru metin á átta milljónir króna árið 2013.

„Ég vona svo mikið að þetta væri djók. Mig langaði hreinlega ekki að trúa þessu,“ skrifar Valborg. Hún segist ekki vilja trúa því að fyrirtæki sem ræðu öllum markaðnum í tæknifrjógvunarmálum á Íslandi eigi alla þessa peninga en vinni ekki að því að bæta tæknina og þjónustuna sem það veitir.

Sorglegt að vita af mörgum sem hafa ekki efni á að eignast börn

Hún segist óska þess að fyrirtækið hefði samkeppnisaðila á markaði því þá myndi þjónustan mögulega batna.

„Mér finnst sorglegt að vita af svo mörgum sem hafa ekki efni á því að eignast börn af þeirri ástæðu að þau þurfa á læknisaðstoð að halda sem kostar allt of mikið. Að allt of hár kostnaður komi í veg fyrir að ótal margir fái drauma sína uppfyllta. Kæra Art Medica - ég vona að ykkur vegni vel og takið vel á móti mér þegar ég loksins næ að safna þeim 468.660 krónum sem meðferðin mín mun kosta með gjafasæði, en utan allra lyfja.“

Stöðugar peningaáhyggjur

Valborg segir í samtali við Vísi að nógu erfitt sé að takast á við erfiðleikana og ferlið sem tæknimeðferðir eru svo ekki þurfi líka að hafa stöðugar áhyggjur af peningum. „Því að borða ódýrt, kaupa engan óþarfa, neita sér um “klukkutímaskemmtanir”, og hugsa alla daga um hvernig hægt sé að fjármagna næstu tilraun. Tilraun sem enginn veit hvort endar með sorg eða gleði.“

Hún bendir á að eitt af hverjum sex pörum sem þrá að eignast barn eigi í erfiðleikum með það. „Og þessar hækkanir eru alveg ábyggilega ekki það sem fólk þarf á að halda ofan á allt annað.“

Vonar að þingsályktunartillaga fái brautargengi

Valborg segir að hún voni að þingsályktunartillaga Silju Daggar Gunnarsdóttur, þingmanns Framsóknarflokksins, um aukinn stuðning vegna tæknifrjóvgana, verði veitt brautargengi á þessu þingi. Tillagan var lögð fram á síðasta þingi en náði ekki fram að ganga.

Kæra Art Medica.Ég hef nýtt mér þjónustu ykkar í tæknifrjóvgunarmálum í töluvert langan tíma. Nú er svo komið að ég...

Posted by Valborg Rut Geirsdóttir on Thursday, September 10, 2015