Of Monsters and Men í þriðja sæti Billboard-listans

Önnur hljóðversplata Of Monsters and Men, sem ber heitið Beneath the Skin, náði í dag þeim árangri að ná þriðja sæti á bandaríska Billboard-listanum.

Þetta kemur fram á vefsíðu listans sem gefinn er út vikulega og greinir frá vinsælustu og söluhæstu hljóðplötunum vestanhafs.

Platan hefur selst í 57 þúsund eintökum í Bandaríkjunum og er þetta besti árangur sem sveitin hefur náð til þessa en fyrri breiðskífa sveitarinnar, My head is an animal, náði hæst sjötta sæti listans árið 2012. Hún seldist í 55 þúsund eintökum á einni viku.

Platan náði einnig þeim árangri að vera sölushæsta breiðskífan á sölulista iTunes í liðinni viku.

Sveitin skýtur með árangri sínum þekktum sveitum á borð við The Rolling Stones, Ed Sheeran, Florence + and the machine og A$AP ROCKY ref fyrir rass.

Efstir á listanum trónir breska rokksveitin Muse með sjöundu plötu sinni, Drones,en þetta er í fyrsta sinn sem sveitin kemst á topp bandaríska vinsældalistans.

Í öðru sæti er plata Taylor Swift, 1989 sem seldist í 64 þúsund eintökum í vikunni.

Of Monsters and Men  er um þessar mundir á stífu tónleikaferðalagi og kom til að mynda fram í sjónvarpsþáttunum vinsælu Good Morning America og The Tonight Show With Jimmy Fallon á dögunum. Í bæði skiptin lék sveitin lagið Crystals. Sveitin verður á ferðalagi það sem eftir ef af árinu.