Assad viðurkennir vanmátt hersins

Bashar al-Assad Sýrlandsforseti viðurkenndi í sjónvarpsávarpi í gær að sýrlenski herinn væri orðinn vanmáttugur vegna borgarastyrjaldarinnar sem geisað hefur í Sýrlandi í rúm fjögur ár.

Assad sagði í ræðu sinni að búnaður hersins vær viðunandi en að mikil mannekla stæði honum fyrir þrifum. Herinn, sem taldi áður um 300 þúsund hermenn, hefur minnkað verulega vegna dauðsfalla en einnig vegna þess fjölda sem gengur úr hernum og einstaklinga sem koma sér undan herkvaðningu. Um 70 þúsund manns hafa skorast undan herþjónustu og um 80 þúsund hermenn látist í átökum. Á laugardaginn lýsti Assad því yfir að uppgjafarhermenn og þeir sem sniðgengu herkvaðningu fengju friðhelgi og sakaruppgjöf.

Sýrlenski herinn hefur þurft að yfirgefa svæði í norðurhluta Sýrlands og fengu uppreisnarmenn m.a. borgina Idlib í hendur í mars. Assad sagði að eftirgjöfin hefði verið nauðsynleg þar sem hersins var þörf á öðrum vettvangi.

Þrátt fyrir skakkaföll hersins reyndi Assad að stappa stáli í þjóð sína. „Þetta þýðir ekki að við eigum að ræða hrun. Við munum spyrna við fótum. Herinn er hæfur til að verja móðurlandið.“

Herinn hefur verið á töluverðu undanhaldi síðustu mánuði en uppreisnarmenn hafa sótt á stjórnarherinn á nær öllum vígstöðvum. Í norðri hefur deild al-Kaída í Sýrlandi náð nokkrum landvinningum. Í suðri hefur uppreisnarher stjórnarandstöðunnar náð yfirráðum á stóru svæði og í austri hefur Íslamska ríkið lagt undir sig gríðarstór landsvæði.

Assad gagnrýndi önnur ríki sem ýta undir starfsemi uppreisnarmanna en hann sagði stuðning þeirra grafa undan stöðugleika í Sýrlandi. Tyrkland, Katar og Sádi-Arabía hafa meðal annars stutt við bakið á uppreisnarmönnum.

Átökin hafa kostað um 230 þúsund manns lífið og hrakið milljónir á flótta.