Þetta gerðist þegar Stjarnan og FH mættust á Samsung-vellinum í fyrra | Myndband

Stjarnan og FH mætast í stórleik 5. umferðar Pepsi-deildar karla á Samsung-vellinum í Garðabæ í kvöld.

Þessi lið börðust um Íslandsmeistaratitilinn í fyrra og mættust sem kunnugt er í úrslitaleik í Kaplakrika þar sem Stjörnumenn höfðu betur eftir mikla dramatík.

Fyrri leikur liðanna í 11. umferð var einnig dramatískur í meira lagi en honum lyktaði með 2-2 jafntefli.

FH komst yfir með marki Atla Viðars Björnssonar á 23. mínútu en Arnar Már Björgvinsson jafnaði metin 11 mínútum síðar.

Staðan var 1-1 í hálfleik og fram á 67. mínútu þegar Martin Rauschenberg, miðvörður Stjörnunnar, setti boltann í eigið mark. Strax eftir markið fékk Pétur Viðarsson að líta sitt annað gula spjald og þar með rautt hjá dómara leiksins, Garðari Erni Hinrikssyni, en hann dæmir einmitt leikinn í kvöld.

Veigar Páll Gunnarsson jafnaði svo metin í 2-2 á 82. mínútu með umdeildu marki en erfitt var að sjá hvort boltinn hafi farið inn fyrir línuna.

Allt það helsta úr leiknum má sjá í spilaranum hér að ofan.