Dýrasta ilmvatn heims til landsins

Lísa Ólafsdóttir, eigandi Madison ilmhúss, selur dýrasta ilmvatn heims. 50 ml eru á um það bil 128 þúsund krónur, sem gerir lítraverð ilmsins tvær og hálfa milljón.

„Clive Christian, sem þekktur er fyrir afar glæsilega hönnun, var að gera upp gamalt hús í London fyrir tuttugu árum þegar hann rakst á dularfulla litla græna flösku undir gömlu gólfinu. Þetta reyndist vera ævaforn ilmur með stimpli ilmframleiðanda konungsfjölskyldunnar. Forvitnin leiddi hann til þess að endurvekja breska ilmhúsið og hanna þrjá einstaka ilmi sem kallaðir eru 1872, X og No.1,“ segir Lísa Ólafsdóttir, eigandi Madison ilmhúss í Aðalstræti 9 í Reykjavík, sem selur þessa gæðailmi.

Breski lúxusinnanhúshönnuðurinn Clive Christian kom með ilminn No.1 á markað árið 1999 sem reyndist vera dýrasta ilmvatn á heimsmarkaðnum. Sagan á bak við þennan dýrindis púðurkennda ilm er frekar óvenjuleg en 125 árum eftir að Viktoría drottning gaf bresku ilmhúsi leyfi til að merkja ilmi með konunglegu kórónunni sem gæðastimpli, vakti Christian framleiðsluilmhúsið til lífs.

„Lagt var af stað með þá dagskipan að búa til hinn fullkomna ilm án takmarkana, verðmiða eða sérstaks markhóps og fyrir tilviljun varð No.1 dýrasta ilmvatn heims þar sem notað er mikið magn af gæðahráefnum við gerð þess. Ilmurinn er púðurkenndur, mjög klassískur og elegant. Hann er aðeins seldur í fínni vöruhúsum og sérhæfðum ilmhúsum,“ segir Lísa.

En hvað er verðmiðinn á svona einstökum ilmi? „Flestir finna strax hvað er sérstakt við ilminn, dýptina og gæðin sem eru heillandi. No.1 kostar um það bil 128 þúsund krónur fyrir 50 ml en hinir tveir ilmirnir eru ekki eins dýrir. Madison ilmhús selur ilmi með ólíku verði en þegar þú velur þér persónulegan ilm á þetta að vera ferðalag og skemmtileg upplifun. Við erum í nánu sambandi við ilmhönnuði sem gera hlutina af ástríðu."