Töskur með teikningum af Akureyri

Grafíski hönnuðurinn og myndlistarmaðurinn Ania Litvintseva sýnir um þessar mundir í Menningarhúsinu Bergi á Dalvík. Línuteikningar hennar hafa vakið athygli en hún hefur útfært þær á töskur.

Ég flutti til Íslands fyrir rúmu ári og vinn sem jógakennari í líkamsræktarstöðinni Átaki á Akureyri. Ég er frá Austur-Síberíu, bjó nokkur ár í Kína, í nokkra mánuði á Indlandi og nokkur ár í Póllandi áður en ég útskrifaðist úr grafískri hönnun í Rússlandi árið 2010,“ segir listakonan Ania Litvintseva, en hún hefur vakið athygli fyrir teikningar sínar og myndlistarverk. 

Á Akureyri má gjarnan sjá Aniu sitja á kaffihúsum og teikna en hún segist nýta sér kaffihúsin til að vinna og eldhúsborðið heima.

„Ég á alveg eftir að koma mér upp vinnustofu,“ segir hún. 

Sýning á verkum Aniu, 50 shades of red, stendur nú í Bergi, menningarhúsi á Dalvík þar sem umfjöllunarefni Aniu er rauðhært fólk.

„Þetta er portrettsýning en ég hef líka verið að prenta teikningar á póstkort og á textíl. Mér finnst það mjög skemmtilegt og mín fyrsta textíllína er töskur með teikningum af Akureyri. Síðar er von á fleiri útgáfum,“ segir Ania.

Hvaðan færðu innblástur?

„Frá umhverfinu í kringum mig og öllu sem ber fyrir augu hér á Akureyri.“

Sýning Aniu í Bergi stendur til 28. október. Nánar má forvitnast um myndlist Aniu á: www.behance.net/ania_akureyri og á Facebook. Töskurnar fást í Flóru á Akureyri.