Fékk nóg af munntóbaksneyslunni

„Viðbrögðin á Facebook komu mér og fólkinu í kringum mig heldur betur á óvart,“ segir Íris Grímsdóttir, sem fékk sig fullsadda af munntóbaksneyslu kærastans á dögunum og tók málin í sínar hendur.

Íris tók mynd af sjálfri sér með blað sem á stóð að ef 1.000 manns myndi líka við myndina ætlaði kærasti hennar, Geirmundur Vikar Jónsson, að hætta allri neyslu á munntóbaki.

„Myndir af fólki í alls konar áskorunum hafa verið vinsælar á Facebook. Ég sendi kærastanum mynd af lítilli stelpu sem fékk pabba sinn til þess að hætta að reykja fyrir 1.000 „like“ og spurði hvort hann myndi hætta að taka í vörina ef hann fengi áskorun frá mér. Hann sagðist ekki hafa neina trú á því að ég myndi ná 1.000 lækum en óskaði mér góðs gengis. Þar sem ég er algjör keppnismanneskja varð ég að afsanna þetta, lét slag standa og skellti myndinni á Facebook.“

Myndin sló í gegn og á einum og hálfum sólarhring var hún komin með tæp 4.000 „like“. Það var því lítið annað fyrir Geirmund að gera en að leggja munntóbakinu fyrir fullt og allt.

„Honum gengur furðulega vel. Fyrstu tímarnir eftir að hann losaði úr vörinni í seinasta skipti voru honum erfiðir en nú ber hann sig ótrúlega vel.“

Samkvæmt tölum frá ÁTVR hefur sala á munntóbaki stóraukist undanfarin ár.

„Verst finnst mér þegar ungt fólk, sem aldrei hefur notað tóbak áður, byrjar á því, þrátt fyrir allar forvarnir og auglýsingaherferðir um skaðsemi tóbaks.“