Um þrjú þúsund ferðamenn í skipi

Fjögur erlend skemmtiferðaskip hafa lagst að bryggju við Skarfabakka og Miðbakka í Reykjavík núna í maí.

Fyrsta skipið sigldi í höfn fyrir viku, Thomson Spirit frá Bretlandi með 1.200 farþega. Japanskt skip, Asuka II, sem er á ferðalagi um heiminn lagðist að bryggju fyrir viku með 800 manns um borð, skömmu síðar kom Voyager og á sunnudag kom hingað skemmtiferðaskipið Fram frá Noregi. Næststærsta skipið sem kemur í sumar, Adventures of the Seas, sem er rúm 137 þúsund brúttótonn, leggst svo að bryggju 3. júní.

Alls eru 89 skemmtiferðaskip væntanleg hingað til lands í sumar. Flest þau stærstu koma frá Bandaríkjunum með allt að 3.000 ferðamenn en einnig koma hingað allt niður í eitt hundrað manna skip.

Það hefur aukist að skipin séu yfir nótt í Reykjavík og oft og tíðum leggja þau einnig að bryggju í tveimur til þremur öðrum höfnum til viðbótar, þar á meðal á Akureyri, Ísafirði og í Vestmannaeyjum.

Gunnar Rafn Birgisson hjá ferðaskrifstofunni Atlantik sem skipuleggur ferðir skemmtiferðaskipa til Íslands segir að það fari eftir þjóðerni gestanna hvað þeir gera á meðan á dvöl þeirra stendur. Þjóðverjar og Bandaríkjamenn séu til að mynda gjörólíkar tegundir ferðamanna. Um 80 til 90 prósent Þjóðverja fari í skipulagðar ferðir þar sem ferðalag að Gullfossi og Geysi sé vinsælast. Aðeins um 50 til 60 prósent Bandaríkjamanna nýti sér þjónustuna.

„Þetta er líka mismunandi eftir höfnum. Það er hærra hlutfall ferðamanna sem fer í skipulagðar ferðir í Reykjavík og á Akureyri en í minni bæjum þar sem kannski eru ekki jafn margir möguleikar í boði,“ segir Gunnar Rafn.