Himnastigatríóið snýr aftur

Tríó saxófónleikarans Sigurðar Flosasonar, Himnastigatríóið, heldur tónleika í Hannesarholti í kvöld klukkan 20.30. Tónleikarnir eru tileinkaðir söngkonunni Billie Holiday en hún hefði orðið 99 ára þann 7. apríl síðastliðinn. Á efnisskrá verða lög sem Billie hljóðritaði og tengjast henni sterklega.



Tríóið skipa, auk Sigurðar, þeir Eyþór Gunnarsson á píanó og danski kontrabassaleikarinn Lennart Ginman, en hann kemur hingað til lands sérstaklega vegna þessara tónleika. Tríóið er stundum kennt við sinn fyrsta disk, Himnastigann, sem kom út árið 1999 og fékk frábæra dóma. Tveimur árum síðar kom annar diskur, Djúpið, sem hlaut einnig mjög góðar viðtökur.



Himnastigatríóið snýr nú aftur eftir langt hlé og einbeitir sér, nú sem fyrr, að túlkun klassískra djassstandarda með áherslu á lifandi og ljóðrænt samspil. Þess má geta að Sigurður Flosason var kjörinn djassleikari ársins á íslensku tónlistarverðlaununum í febrúar sem leið og Eyþór Gunnarsson hlaut, ásamt félögum sínum í Mezzoforte, heiðursverðlaun íslensku tónlistarverðlaunanna. Lennart Ginman er einn af fremstu kontrabassaleikurum Dana, bæði vel þekktur og virtur í dönsku djasslífi.



Bille Holiday er í hópi áhrifamestu söngkvenna djassins. og flutti bæði klassíska standarda og eins lög sem samin voru sérstaklega fyrir hana. Tríóið mun á tónleikunum í kvöld flytja blöndu af hvoru tveggja.