Fjölnir nefnir fola eftir vini

Útvarpsmaðurinn Ívar Guðmundsson er kátur þessa dagana vegna þess að vinur hans, Fjölnir Þorgeirsson, nefndi folald eftir honum. Fjölnir tilkynnti nafngiftina á Facebook-síðu sinni og segir: „Hann verður pottþétt stóðhestur framtíðarinnar og á eftir að vera í fullu fjöri til ársins 2069, eins og nafni hans. Ekki leiðum að líkjast.“

Einnig hefur Fjölnir gefið folaldi nafnið Lucinda, í höfuðið á fréttakonunni Telmu Lucindu Tómasson, og eitt folaldið fær nafnið Bryndís í höfuðið á fyrrverandi kærustu hans.

Hann segist vera duglegur að nefna folöld eftir kærustum sínum og í kjölfarið koma fjölmargar stríðnislegar athugasemdir á vegginn hans frá vinkonum sem heimta að folöld verði nefnd eftir þeim ásamt vangaveltum um hvað næstu folöld muni heita.