Kastað fram af svölum af tíundu hæð

Áslaug Perla Kristjónsdóttir var 21 árs, fædd í janúar árið 1979. Föstudagskvöldið 26. maí árið 2000 hélt Áslaug Perla í gleðskap með vinum sínum og sneri aldrei aftur heim eftir þetta örlagaríka kvöld. Hún hitti mann í miðbæ Reykjavíkur eftir að skemmtistöðum bæjarins hafði verið lokað þetta kvöld og fannst látin skömmu síðar.

„Hún var pínulítill snillingur, fljót að læra að lesa, ári á undan í skóla, ákveðin, þorin. Hún hafði þörf fyrir að skapa.“ Þetta segir Ragnheiður Kristjónsdóttir, systir Áslaugar Perlu, sem hefur aldrei tjáð sig um mál systur sinnar fyrr en nú.

Dagarnir í kjölfarið þungbærir

„Manni finnst fyrsti dagurinn sem maður fréttir þetta ofsalega erfiður en þá veit maður ekki hvað á eftir að koma. Það sem kemur á eftir verður oft miklu erfiðara. Þá áttar fólk sig á því að þetta sé veruleikinn. Hún kemur ekkert aftur og fólk syrgir manneskjuna gríðarlega, líka hvað hefði orðið.“

Áslaug Perla lést eftir að hafa verið kastað fram af svölum á 10. hæð Engihjalla 9 þennan örlagaríka morgun.

„Þau eru þarna eitthvað uppi og að mínu viti gerist eitthvað þannig að hann beitir hana einhverju valdi og hendir henni yfir svalirnar,“ segir Ragnheiður.

Eins og dómínó

Héraðsdómur Reykjaness dæmdi Ásgeir Inga Ásgeirsson í 14 ára fangelsi fyrir morðið á Áslaugu Perlu. Hæstiréttur þyngdi refsinguna um tvö ár. Málið hefur tekið mikið á móður Áslaugar Perlu sem hefur aldrei verið sátt við dóminn. 14 árum eftir morðið skrifar hún reglulega greinar um málið og þá þætti þess sem henni finnst þurfa að leiðrétta.

„Ég veit ekki hvort nokkur skilji það þegar eitthvað svona gerist. Einhver sviptir aðra manneskju lífi og þá er þetta eins og dómínó, þú ert að eyðileggja allt í kringum þessa fjölskyldu. Þetta var ofsaleg sorg og ofsalegur missir. Það er erfitt að sætta sig við að svona gerist, eitthvað sem er algjör óþarfi og átti aldrei að gerast,“ segir Ragnheiður að lokum.

Fjallað verður ítarlega um málið í þættinum Íslenskir ástríðuglæpir á Stöð 2 klukkan 20.50 á sunnudagskvöld.