Kosningavefur kominn í loftið

Vísir hefur opnað kosningavef sinn, visir.is/kosningar, þar sem sveitarstjórnarkosningum á öllu landinu þann 31. maí verða gerð góð skil.

„Styrkur okkar sem fréttastofu á öllum þremur miðlunum, Fréttablaðinu, Vísi og Stöð 2, birtist glögglega á kosningavefnum okkar,“ segir Kolbeinn Tumi Daðason, fréttastjóri Vísis.

Á kosningavef Vísis er safnað saman öllum fréttum úr öllum miðlum sem snúa að sveitarstjórnarkosningunum. Þá er einnig fylgst með skoðunum kjósenda og annarra sem tjá sig á samfélagsmiðlum. Þar má einnig finna innsendar greinar frá frambjóðendum sem stuðningsmönnum, auk Oddvitaáskorunarinnar sem Vísir stendur fyrir.

„Þar hafa oddvitar um allt land tækifæri til þess að koma stefnumálum sínum á framfæri, auk þess sem þeir svara spurningum og bregða á leik,“ segir Kolbeinn Tumi.

Fréttamenn Vísis eru þar með komnir í kosningagírinn og ætla sér að veita lesendum sínum góða þjónustu með öflugum fréttaflutningi af málefnum sveitarstjórnarkosninganna í öllum sveitarfélögum landsins.

Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar.