Drulla frá framkvæmdum barst í Varmá

„Umhverfisnefnd harmar að aurugt vatn hafi runnið í stórum stíl í Varmá vegna framkvæmda efst í Reykjahverfi,“ segir í bókun umhverfisnefndar Mosfellsbæjar.

Ráðist mun hafa verið í mótvægisaðgerðir og á umhverfissvið bæjarins að fylgjast náið með framkvæmdum á næstunni.

Þá vill umhverfisnefndin að Mosfellsbær setji metnaðarfullar verklagsreglur um umgengni á viðkvæmum náttúrusvæðum sem framkvæmdaaðilum verður gert að vinna eftir. Mikilvægt sé að nefndin verði framvegis höfð með í ráðum, sem ekki hafi verið gert í þessu tilviki.