Stærstu sumarlokanir í sögu SÁÁ: „Þetta bitnar á sjúklingunum'“

Væntanlegar sumarlokanir hjá SÁÁ verða þær umfangsmestu frá upphafi. Göngudeildum í Reykjavík og á Akureyri og meðferðarheimilum á Staðarfelli og í Vík verður lokað frá 20. júní og fram í ágúst.

„Þessar sumarlokanir trufla alltaf en eru að einhverju leyti óumflýjanlegar, það er erfitt að manna stöður yfir hásumartímann,“ segir Þórarinn Tyrfingsson, yfirlæknir á Vogi. „En það bætir í þetta að við höfum ekki peninga.“

Fjárveitingar ríkisins til Vogs og SÁÁ voru töluvert skornar niður eftir hrun. Því hefur SÁÁ undanfarin fimm ár þurft að nýta mikið af eigin sjálfsaflafé til að borga fyrir meðferðir á Vogi. Að sögn Þórarins nam þessi fjárupphæð á síðasta ári tuttugu prósentum af rekstrarkostnaði SÁÁ, eða um 200 milljónum króna. Vegna þessa hefur þurft að grípa til sparnaðaraðgerða og segir Þórarinn að Vogur hafi ekki verið rekinn á fullum krafti undanfarið.

„Nú eru yfir þrjú hundruð manns á biðlista, þá fólk sem er í mikilli neyslu,“ segir Þórarinn. Hann segir sparnaðaraðgerðir sem þessar hafa augljósar neikvæðar afleiðingar í för með sér.

„Þetta bitnar á sjúklingunum. Það munu fleiri falla og fallið verður þá hærra og dýrara fyrir þjóðfélagið.“

Þórarinn segist vona að starfsemi samtakanna geti hafist á ný af fullum krafti eftir sumarlokanirnar og að meira fé berist frá hinu opinbera.

„Það vonum við, að vísu er mikil óvissa um framhaldið,“ segir Þórarinn. „En við höfum unnið með ríkinu undanfarin fjórtán ár með góðum árangri.“