Loka þarf göngudeild hjá SÁÁ

Loka þarf göngudeild SÁÁ í Efstaleiti og meðferðarheimilinu Vík vegna mikils taprekstrar hjá Vogi. Þetta kom fram í viðtali við Þórarinn Tyrfingsson yfirlæknir á Vogi í Reykjavík síðdegis í gær.

„Vogur er rekinn með 150 milljóna króna halla á ári, þess vegna þarf að leita sparnaðar og við lokum  göngudeildinni í Efstaleiti og meðferðarheimilinu Vík.  Eins er Vogur rekinn á ¾ afköstum yfir sumarið.  Staðarfelli er hinsvegar haldið opnu“, sagði Þórarinn í gær.

Nokkuð hefur borið á því að aðstandendur áfengis- og vímuefnasjúklinga hafi miklar áhyggjur af sumarlokunum SÁÁ, sem standa til 10. ágúst, sérstaklega nú þegar Verslunarmannahelgin nálgast.

Þórarinn telur að það mætti gera miklu betur en nú er gert, en sem stendur eru langir biðlistar inn á Vog og það bitnar oft á þeim sem eru veikastir.

„Mikið er í húfi fyrir fólk í fallhættu, það þarf hjálp strax.  SÁÁ borgar mikið inn í þetta af sínu sjálfaflafé eða allt að 200 milljónum á ári og þó samtökin séu sterk þá þurfa að koma framlög til þessara mála frá opinberum aðilum.  Okkur finnst eins og réttur áfengis- og vímuefnasjúklinga sé oft fyrir borð borin.  Við biðlum ekki til ríkisins, það er einfaldlega skylda ríkisins að sinna þessum sjúklingum.  Það þarf að standa sig betur í þessu”, segir Þórarinn og bætir við að það meðferðin svari vel kostnaði, því ávinningurinn komi strax til baka til dæmis með lækkun á kostnaði við löggæslu og annars staðar í heilbrigðisþjónustunni.

„Sjóðstreymið er á núlli og við þolum þetta alls ekki lengur og líklega, þegar kemur fram á haust, þá gæti komið til þess að við þyrftum að grípa til enn frekari niðurskurðaraðgerða á þjónustunni”, segir Þórarinn.

Hann segir að ráðamönnum sé kunnugt um stöðu mála, en þeim sé vorkunn því SÁÁ sé ekki eini aðilinn í heilbrigðisþjónustunni sem eigi í vanda.  „En við teljum að við eigum núna inni velvild hjá hinu opinbera.  Það ætti að hugsa sérstaklega til þess nú í aðdraganda fjárlagagerðar”, sagði Þórarinn að lokum.

Hægt er að hlusta á viðtalið við Þórarinn hér fyrir ofan.