Fótboltastjörnur hrifnar af Inklaw

Æskuvinirnir Róbert Elmarsson og Guðjón Geir Geirsson hafa haft áhuga á tískufatnaði lengi vel. Eftir að hafa unnið í nokkrum fataverslunum ákváðu þeir að stíga skrefið til fulls og hanna fatnað fyrir herra undir eigin nafni. Samanlagt lögðu þeir fram áttatíu þúsund krónur af sumarlaununum sínum til að stofna vörumerkið Inklaw, sem nú hefur vakið athygli frægra fótboltamanna og söngstjarna erlendis. 

Þeir stefna hátt þrátt fyrir að vera einungis rétt um tvítugt en draumurinn er að eiga virt vörumerki sem er þekkt út um allan heim. „Þetta er stór draumur en við ætlum að láta hann verða að veruleika. Við fáum mikinn stuðning og skilning frá skólanum. Við fáum meira að segja frídag einu sinni í viku til að sinna fyrirtækinu okkar sem er komið á góðan skrið á skömmum tíma,“ segir Róbert Elmarsson, annar eigandi götutískumerkisins Inklaw.

Róbert stundar nám í Flensborg en Guðjón Geir Geirsson, félagi hans og besti vinur, er að læra fatatækni í Tækniskólanum. Vinirnir framleiða og sauma allan fatnaðinn sjálfir á saumastofu í Hafnarfirði með hjálp vinkonu sinnar, Báru Atladóttur sem er menntaður fatahönnuður. Pantanirnar streyma inn í gegnum netverslun þeirra en Róbert segir að Instagram hafi virkilega komið þeim á kortið.

„Samskiptamiðlarnir í dag hjálpa mikið til. Flestar sölurnar koma í gegnum Instagram því um leið og einn glaður viðskiptavinur póstar mynd af sér í flík frá okkur þá koma fleiri pantanir. Með netinu höfum við náð að komast á erlendan markað og nú erum við að selja til 25 landa.“

Viðskiptavinirnir eru ekki af verri endanum en nýlega var haft samband við þá félaga fyrir hönd hins enska Daniels Sturridge sem spilar sem framherji hjá Liverpool. Sturridge óskaði eftir fatnaði frá Inklaw fyrir nýtt hipphopp-verkefni sem nefnist FOE, eða Family Over Everything. Portúgalski knattspyrnumaðurinn Raul Meireles sást einnig fyrir skömmu í Inklaw-bol og söngvarinn Liam Ferrari sem tók þátt í Australia Got Talent er viðskiptavinur. 

Í sumar munu Inklaw-félagarnir starfa sjálfstætt í fyrsta sinn heilt sumar og segjast hlakka til að geta eytt öllu sumrinu í að reka fyrirtækið og sinna pöntunum.